Ti Panagderraaw Saanna a Mapasardeng ti Naimbag a Damag
MAYSA nga aldaw idi napalabas a Pebrero, ti nabayagen a segseggaan a baro nga ekonomiko a pagannurotan ti Venezuela ket inyanunsioda. Naipangato dagiti presio iti nasurok a 100 porsiento kadagiti pamunganayan a taraon kas ti gatas, arina, ken tinapay. Ti presio ti gasolina ngumato met ti 90 porsiento. Ti plete ti transportasion naautorisaran a ngumato agingganat’ 30 porsiento. Nabigla ti pagilian. Dagdagus, iti Lunes, Pebrero 27, nagtignay ti ili babaen ti panagderraawda iti intero a pagilian.
Iti sumaganad nga agsapa, nakagtengen dagiti bambanag iti kangitingitan ti panagdadaelda ken panagtaktakawda. Agallangogan ti paltog iti sumagmamano a lugar. Agpadpada dagiti agtutubo ken natataengan makapungtotda a napan kadagiti lansangan ti siudad, nga iti liklikudanda nangibatidat’ panangdadael nga umas-asping iti gapuanan ti gubat.
Iti dayta a malem ti presidente ti pagilian indeklarana ti napeggad a kasasaad ken sinuspendina dagiti garantia ti konstitusion iti sangapulo nga aldaw. Maysa a curfew ti naiyusuat kadagiti oras iti nagbaetan ti alas 6:00 t.m. ken alas 6:00 t.b. Iti sumaganad nga aldaw, inyanunsio ti ministro ti depensa nga agtultuloy ti curfew agingga iti sumaganad a pakaammo. Inusar ti militaria ti autoridadna a mangituray kadagiti lansangan, sumrek kadagiti pagtaengan nga awan autorisasion, ken pasardengenna ken rikisaenna dagiti tattao. “Dua gasut a natnatay ken sangaribo a nasugsugatan iti tallo nga aldaw a gulo,” impadamag ti maysa a pagiwarnak.
Aniat’ kasasaad dagiti kongregasion dagiti Saksi ni Jehova kabayatan ti gulo? Nabalakadan dagiti kakabsat: Agannadkayo ken lisianyo dagiti lugar ti gulo. Baliwanyo dagiti oras ti gimong tapno makitunos iti curfew, ken lisianyo ti panangasaba iti dadakkel a grupo. Kaskasdi, ti panangikasaba ti naimbag a damag ti Pagarian ti Dios nagtultuloy.—Mateo 24:14; 28:19, 20.
Gapu ta ti di manamati nga asawa a lalaki ti maysa a babai a Kristiano ket madanagan maipapan ti pagsayaatan ni baketna no isut’ rummuar iti balay a mangaskasaba, pinaritanna a pumanaw. “Dika maawatan nga addaanak tutungpalen nga obligasion,” kuna ti babai ken lakayna. “Gapuna umayka itan! Iyadalanka ita ti Biblia!”
Daytoy ti damdamo a panangiyebkas ni lakayna iti ayatna nga agadal ti Biblia iti uneg ti 22 años a daytoy a babai ket Saksi. Kaskasdi isut’ namakdaar: “O sige, la ketdi no ikarim a saanka a rumrummuar. Ngem dinak pagsalsaludsodanen, basta ibasaannak laeng.” Nupay kasta, ti kabsat a babai ti nangiyadal kenkuana iti maysa ket kagudua nga oras. “Daytat’ modelo a panagadal, ti kasasayaatan pay laeng a panagadal a naaramidak iti 22 tawen a kaaddak iti kinapudno,” kunana, bayat nga agarubos ti lulua kadagiti matana.
Iti sabali pay a kaso, maysa a regular payunir ti agsagsagad iti banketa iti ruar ti balayda idi isut’ inasitgan ti maysa a baket a pulos di dumdumngeg kadagiti Saksi kada adda mapan idiay balayda. “Dikay nakita a Saksi iti daytoy nabiit pay a napan nangaskasaba,” kuna ti baket. “Dikay kunaen a saankay pulos a mangaskasaban!”
Inlawlawag ti kabsat a babai a nagsardengda laeng a nangaskasaba iti binalaybalay bayat ti panagderraaw. “Ngem umay ti aldaw inton saankamton a mangaskasaba kadagiti tattao, ket kaipapananto dayta ti panungpalan ti lubong,” kuna ti kabsat a babai. “Rebbeng a gundawayamon ita ken umawatkan ti panangyadal ti Biblia idiay balayyo.”
“Kaanotay nga iyurnos?” insaludsod a dagus ti baket. Idiay a mismo ken iti dayta nga oras a naaramid dagiti urnos a rugian ti panangyadal ti Biblia iti pagtaengan.
Pagyamanan unay, ta nagsardeng met laengen ti gulo, a nangisubli a normal kadagiti bambanag iti pagilian. Kaskasdi, kadagita a nakadadanag a kasasaad, makaliwliwa a maammuan a din agbayag ti baro a lubong ti kinatalinaay ken kinatalged addanto ditoyen. Inkari ti Sao ti Dios: “Ngem kas mayannurot iti karina datayo urayentayo dagiti babbaro a langlangit ken ti maysa a daga a baro, isu a pagtaengan ti kinalinteg.” (2 Pedro 3:13) Ket agingga nga ipalubos ti Dios, agtultuloy nga ikaskasaba dagiti Saksi ni Jehova ti naimbag a damag ti Pagarian.
[Dagiti ladawan iti panid 31]
Ti kinagulo saanna a pinasardeng dagiti manangiwaragawag ti Pagarian
[Credit Line]
Retrato ti Publicaciones Capriles, Caracas, Venezuela.