Ti Danum ti Biag

“SIASINOMAN a makangngeg kunana koma: ‘Umayka!’ Ket ti siasinoman a mawaw umay koma; ti siasinoman a mayat awatenna koma ti libre a danum ti biag.” (Apocalipsis 22:17) “Danum ti biag”​—kaipapanan dayta ti amin a probision ti Dios nga agpaay a pakaisalakanantayo a naibatay iti daton a subbot ni Jesu-Kristo. Magun-odan dagitoy a probision, ken awan bayadda. Anian a nakaay-ayat a kinamanagparabur iti biang ti Diostayo! Nupay kasta, apay nga isimbolo ida ti danum?

Bueno, ti literal a danum patubuenna dagiti mula iti daga, ken dayta ti mamagbalin a posible ti biag ti tao. No awan ti danum, awan ti biag ti mula, ken kasta met ti tao. Kanayonanna, ti bagiyo ket 65 porsiento a danum. Irekomendar dagiti sumagmamano nga espesialista iti salun-at a mantiniren dayta a porsiento babaen ti iyiinum iti agarup dua punto kuatro litro a danum iti kada aldaw. Amin a sistema iti uneg ti bagiyo​—manipud pannakarunaw ti taraon agingga a mairuar kas rugit​—kasapulanda ti danum. Mataykayo no dikay uminum ti danum iti makalawas.

Umasping iti dayta, ti “danum ti biag” pagbalinenna a posible ken pakirdenna ti naespirituan a biag. No laksidentayo ti danum ti biag, awan ti mataginayon a masanguanantayo. (Juan 3:36) No awatentayo dayta, magun-odantayo ti biag nga agnanayon. Isut’ gapuna a kasta unay ti gagar ti Samaritana idi a kinuna ni Jesus: “Siasinoman nga uminum iti danum nga itdekto kenkuana, uray kaano saanto a mawawen; no di ket ti danum nga itdekto kenkuana agbalinto kenkuana nga ubbog ti danum nga agburburayok a maipaay iti biag nga agnanayon”! (Juan 4:14) Sapay koma ta maaddaantay iti kinagagar ket awatentayo ti libre a danum ti biag.

[Picture Credit Line iti panid 32]

Garo Nalbandian