Kas Kadagiti Mansanas a Balitok

MANSANAS​—anian a makaay-ayoda agpadpada iti mata ken iti pagraman! Inusar ti Biblia daytoy naimas a bunga iti mamagpanunot a panangiyasping a kunkunana: “Ti sao a maitutop ti pannakaisaona ket kas kadagiti mansanas a balitok kadagiti kinitikitan a pirak.” (Proverbio 25:11) Ania ti kaipapanan dagitoy a sasao?

“[Dagiti] mansanas a balitok kadagiti kinitikitan a pirak” mabalin a tukoyenna dagiti bambanag a kinitikitan, kas iti maysa a kinitikitan a bandehado a pirak nga adda naikabil a bunga a balitok. Yantangay dagiti immun-una a bersikulo iti daytoy a kapitulo dakamatenna ti isasango iti maysa nga ari Pro 25:2, 3, 5, 6, nalabit a tukoyen daytoy a bersikulo dagiti sagut a maipaay iti maysa mga agturay​—balitok nga arkos a sinanmansanas a naikabil kadagiti bandehado a pirak. (Proverbio 25:6, 7) Anian a makaay-ayo a talaga!

Adda umasping a kinapintas iti maitutop, nadayaw, naintiempuan a sasao, naisurat man wenno naisawang. Makaay-ayo, makaparegta, ken makagunggonada iti adu a pamay-an. Dagiti impaltiing ti Dios a linaon ti Biblia nangruna a mayasping kadagiti napintas a “mansanas a balitok kadagiti kinitikitan a pirak.”

Kas impakita ti nainsiriban a sasao ni Ari Solomon idiay Proverbio 25:11, ‘sinukimat[na] tapno sarakenna dagiti makaay-ayo a sasao ken ti pannakaisurat dagiti umiso a sasao ti kinapudno.’ (Eclesiastes 12:10; Proverbio 25:1) Kalpasan ti adu a siglo, insurat ni Kristiano nga apostol Pablo: “Amin a Kasuratan impaltiing ti Dios ken makagunggona.” (2 Timoteo 3:16) Wen, naglaon ti Biblia kadagiti makagunggona a balakad, padto, mangiladawan a sasao, ken kinapudno a kasta unay kinasudi ken kinaimnasda nga urayda la lab-awan dagiti gapuanan dagiti kalalaingan nga artesano. Mainayon pay, siasinoman a gumun-od ti sirib manipud iti Sao ti Dios, ti Biblia, maaddaan ti di magatadan a sanikua ken mangnamnama iti biag nga agnanayon.​—Proverbio 4:7-9; Juan 17:3.