Sangapulo a Tawenen nga Aggidgiddan!
IDI napagsaludsodan no kasanot’ panagriknana sangapulo a tawenen ti napalabas idi a ti Español nga edision Ti Pagwanawanan nangrugi a maipablaak a kagiddan ti Ingles, insungbat ti maysa a patpatgen a sister nga Español: ‘Mariknami a maysa dayta a bendision gapu ta ita agpapadatayon, no kasano a mayebkas dayta iti Ingles. No sawek ti Ingles, kanayon a malagipko ti organisasion. “Inang” ti panangawagmi iti organisasion. Naasideg, nadekkettayo. Nagimnas dayta. Nakakaskasdaaw dayta!’
Inyebkas daytoy matalek a sister ti karirikna dagiti adu a di makapag-Ingles a managbasa. Kadagiti napalabas a tawen, agparang dagiti artikulo iti Español nga edision Ti Pagwanawanan innem a bulan kalpasan a maipablaakda iti Ingles. Napadasan met dagiti dadduma a pagsasao ti umasping a pannakaitantan. Di pakasdaawan nga adda nasged a tarigagay nga ipablaak ti isu met laeng a material, nga aggigiddan, iti adu a pagsasao.
Isu a mangrugi iti ruar ti Abril 1, 1984, ti Español nga edision ti kaunaan a naigiddan iti Ingles nga edision. Simmaruno dagiti dadduma a pagsasao. Idi rugrugi ti 1985, naigiddan dagiti edision iti 23 a pagsasao. No adda mabirukan ken masanay a managipatarus, maigiddan dagiti edision iti ad-adu pay a pagsasao iti Ingles.
Ipalagip daytoy a ruar Ti Pagwanawanan ti maikasangapulo a tawen ti aggigiddan a panagipablaak. Maipabpablaak itan Ti Pagwanawanan iti 116 a pagsasao, 85 kadakuada ti aggigiddan. Kaipapanan daytoy a 99.3 porsiento iti dagup a promedio a mapataud a 16,100,000 a kopia Ti Pagwanawanan ti mapatpataud nga addaan agpapada a disenio ti akkub ken artikulo. Kadagidiay tumabtabuno iti linawas a Panagadal iti Pagwanawanan, nasurok a 95 porsiento ti mangad-adal iti isu met laeng a material iti isu met laeng a tiempo.
Ti Agriingkayo! a kadua a magasin Ti Pagwanawanan, ket maipabpablaak itan nga aggigiddan iti 37 kadagiti 74 a pagsasaona. Ti tinawen a Yearbook of Jehovah’s Witnesses ket maipabpablaak iti 18 a pagsasao. Ti kasta nga aggigiddan a panagipablaak agserbi a mamagkaysa iti tattao ti Dios “iti isu met laeng a panunot ken iti isu met laeng a wagas ti panagpampanunot.”—1 Corinto 1:10.