Malagipyo Pay Aya?

Nakitayo kadi nga addaan praktikal a pateg kadakayo dagiti nabiit pay a ruar Ti Pagwanawanan? Ngarud, apay a diyo suboken ti lagipyo kadagiti sumaganad a saludsod:

▫ Apay nga agtultuloy dagiti Saksi ni Jehova a sumarsarungkar kadagiti kaarrubada?

Tarigagayan dagiti Saksi ni Jehova ti pammendision ti Dios kadakuada babaen ti naikari a Pagarian, ken gapu ta ay-ayatenda dagiti kaarrubada, kayatda a maipaay met ti kasta a bendision [kadagiti kaarrubada]. Ngarud, kas panangsurot iti ulidan ni Jesus, ti di agimbubukodan nga ayat ti mangtignay kadakuada a sumarungkar kadagiti kaarrubada. (Mateo 6:9, 10; 22:37-39)​—8/15, pinanid 8, 9.

▫ Apay a maysa laeng a pammati ti panamati iti ebolusion?

Pulos a saan pay a nakapaliiw dagiti sientista kadagiti mutation​—uray dagidiay makagunggona​—a nangpataud kadagiti baro a kita ti biag, ngem kuna dagiti ebolusionista a kastoy ti itataud dagiti baro a kita ti biag. Saan a nakita dagiti ebolusionista ti bigla nga itatanor ti biag, ngem ipapilitda a kastoy ti panangrugi ti biag.​—9/1, panid 5.

▫ Kasanot’ kasayaatan a panangsarangettayo iti pannakaupay a mabalin a yeg dagiti pannakapawil iti biag?

Aniaman ti kasasaadtayo, no ipamaysatay iti mabalintay nga aramiden imbes a pagdukotan ti ditay mabalin nga aramiden, agbalin nga ad-adda a makapnek ti biag, ket masarakantayto ti rag-o iti panagserbi iti Dios. (Salmo 126:5, 6)​—9/1, panid 28.

▫ Ania dagiti pagsayaatan ti panangpakawan?

Ti panangpakawan kadagiti sabsabali itandudona ti nasayaat a relasion (Efeso 4:32); mangyeg daytoy saan laeng a talna kadagiti pada a tattao no di pay ket makin-uneg a talna (Roma 14:19; Colosas 3:13-15); no pakawanentay dagiti sabsabali, mapakawan met dagiti basoltayo (Mateo 6:14); kasta met, tulongannatay daytoy a manglaglagip a datayo a mismo ket agkasapulan iti pammakawan. (Roma 3:23)​—9/15, panid 7.

▫ Kasano a matulongannatay ti ulidan ni mammadto nga Amos iti trabahotayo a panangasaba?

Kas ken Amos, saantay a baliwan wenno pakapsuten ti mensahe ti Dios. Imbes ketdi, sitatallugod nga ipakaammotay dayta uray pay ania ti reaksion dagiti agdengdengngeg kadatayo.​—9/15, panid 17.

▫ Ania dagiti kababalin ti Dios a rumbeng a tuladentayo?

Dagiti dua a kangrunaan a kababalin isu ti abilidad ni Jehova a mangorganisar ken ti kinaragsakna. (1 Corinto 14:33; 1 Timoteo 1:11) Natimbeng dagitoy a kababalin ti Dios, iti kasta saan a maipangpangruna ti maysa kadagitoy iti pagdaksan ti sabali.​—10/1, panid 10.

▫ Ania dagiti sumagmamano a positibo nga addang nga inaramid dagiti nagannak tapno matulongan dagiti annakda nga agserbi ken Jehova?

Ti maysa a napateg a tulbek isu ti nasapa a panangirugi. Agpaut iti unos ti panagbiag dagiti impresion a maawat ken dagiti leksion a maadal bayat iti naganús a tawtawen. (Proverbio 22:6) Nagpateg nga isuro kadakuada ti panagtulnog ken panagraem ken Jehova ken iti panagdaydayaw kenkuana kadagiti amin a gimong. Masursuro dagiti naballigi a nagannak nga ilasin dagiti di umiso a pagannayasan, ket tulonganda dagiti annakda a mangatur kadagitoy. (Proverbio 22:15) Kamaudiananna, rugian a nasapa ti mangikeddeng kadagiti teokratiko a kalat a kabaelan a ragpaten ti anakyo.​—10/1, pinanid 27-8.

▫ Ania a naisangsangayan a galad ti kinamanangpakawan ni Jehova ti rumbeng a yaplikartayo?

Agpadpada a mangpakawan ken manglipat ni Jehova. (Jeremias 31:34) Narigat nga aramiden daytoy dagiti tattao. Impaganetget ni Jesus ti kinapateg ti panangaramid iti kasta, kas nailanad iti Mateo 6:14, 15.​—10/15, pinanid 25-6.

▫ Ania dagiti tallo a lapped iti panagbalintayo a naasi?

Gapu iti managbasol a kasasaadtayo kas tao, mabalin nga agramut ti apal. No umapaltayo iti maysa, kasanotay a maipakitaan iti nadungngo nga asi? Ti di nasken a pannakaimatang iti kinaranggas ket sabali pay a lapped. Daytoy ti mangdadael ti pannakariknatayo iti asi iti panagsagaba dagiti dadduma. Mainayon pay, mabalin nga awanan met iti asi ti tao a ti laeng bagina ti pampanunotenna. (1 Juan 3:17)​—11/1, pinanid  19, 20.

▫ Aniat’ masursurotayo iti Nainkasuratan a salaysay maipapan ken Job?

Ti salaysay maipapan ken ni Job ad-adda nga ipabigbigna kadatayo dagiti pamay-an ni Satanas ken tulongannatay a makakita no kasano a nainaig ti sapasap a kinasoberano ni Jehova iti kinatarnaw ti tao. Kas ken Job, masuot amin nga agayat iti Dios. Makapagibturtay met a kas ken Job, a paneknekan nga ulbod ni Satanas, ken tagiragsaken dagiti bendision ti Pagarian ti Dios.​—11/15, panid 20.

▫ Kasano a maipakita ti tsirman ti maysa a bagi dagiti panglakayen ti umiso a pammadayaw iti tunggal panglakayen?

No mabalbalin, rumbeng a mangipaay a nasaksakbay ti tsirman iti listaan ti pagmimitingan tapno maaddaan iti panawen ti dadduma a panglakayen nga agpanunot a siaannad ken buyogen ti panagkararag iti tunggal punto a nadakamat. Kabayatan ti panagtataripnong dagiti panglakayen, saanna a padpadasen a sukogen ti kapanunotan dagiti panglakayen no di ket paregtaenna ida a mangusar ti “wayawaya iti panagsao” kadagiti banag a mapagsasaritaan. (1 Timoteo 3:13)​—12/1, panid 30.