“Pulos a Diak Pay Nakakita iti Kastoy!”
IDI 1993 naawis ti opisina ti Watch Tower Society idiay Argentina a mangibaon iti sangaribu a delegado idiay Santiago, Chile, para iti uppat-aldaw a “Nadiosan a Panangisuro” a Kombension Distrito dagiti Saksi ni Jehova. Daytoy ti kaunaan a gundaway a naawis dagiti Saksi a taga-Argentina nga agdaliasat kas maysa a dakkel a grupo nga agturong iti maysa a kombension iti sabali a pagilian.a Ti sungbat? Nasurok a 8,500 nga aplikasion ti naawat, a manipud iti dayta 1,039 a delegado ti napili.
Aganay a 14 a bus ti inarkilada iti daytoy 1,400-kilometro a panagdaliasat manipud Buenos Aires agingga iti Santiago. Dagiti nakaskasdaaw a buya ti nangpasayaat iti 26-oras a panagdaliasat. Iti ibaballasiwda iti Kabambantayan ti Andes, limmabas dagiti delegado iti asideg ti Aconcagua, iti kangato nga 6,960 metro, ti kangatuan a pantok iti Makinlaud a Hemispero. Ti ad-adda a nakallalagip isut’ narangkis, agsikkosikko a panagsalog nga agturong idiay Chile. Immawat iti napaut a palakpak dagiti drayber ti bus gaput’ kinalaingda nga agmaneho kadagiti narigat a dalan!
Nupay kasta, ti kapipintasan a buya ket masarakan iti kombension a mismo. Iti lubong a napno iti panagdadangadang dagiti nasion ken riribuk gapu iti pulí, anian a makapabang-ar a makita ti nagkaykaysa a bunggoy dagiti 80,000 a tattao manipud iti 24 a pagilian—pudno a maysa nga internasional a panagkakabsat! Iti pannakakitada a mismo iti panagkaykaysa dagiti kombensionista, inyebkas ti dadduma kadagiti drayber ti interesda a mangammo iti ad-adu pay maipapan kadagiti Saksi ni Jehova. “Pulos a diak pay nakakita iti kastoy!” kinuna ti maysa kadakuada.
a [Footnote]
Gapu kadagiti panangiparit ti gobierno idiay Argentina manipud 1949 agingga iti 1982, imposible idi daytoy nga aramiden.