Inaramidda Gapu iti Ayat
MAYSA a matalek, managpadagus a biuda idiay Canada ti mangpatpatanor kadagiti uppat nga agtutubo nga annakna a babbai kas pudno a Kristiano. Nakita dagiti panglakayen iti kongregasion nga adu ti rumbeng a matarimaan iti pagtaenganna. Awan met ngarud kuartana wenno dina met kabaelan nga aramiden ti trabaho. Gapuna, maitunos iti prinsipio nga adda iti 1 Timoteo 5:9, 10, sitataktika nga inyurnos dagiti panglakayen nga isuda ti mangaramid iti trabaho. Kasano?
Naiplano para iti biuda ken kadagiti annakna a pumanawda pay laeng iti lima nga aldaw. Nasurok a 80 iti kongregasion ti nangipaay iti naimpusuan a suportada, a nagidonarda kadagiti material, kuarta, ken tiempo. Apagpanaw pay laeng ti pamilia, nagaaribungbong iti balay dagiti sigagagar a trabahador a kas kadagiti uyokan. Natarimaan ti intero a ruar ti balay. Natapalan ken napinturaan dagiti diding. Naliha dagiti datar ken napasileng. Naikabil dagiti baro a baldosa ken alpumbra. Natarimaan amin a napateg nga alikamen a de koriente ken silaw. Nasuktan uray dagiti daanen a muebles. Naileppas ti naan-anay a pannakatarimaan [ti balay] iti las-ud laeng ti lima nga aldaw!
Ti arimbangaw ti kinagagar ken panagtrabaho ti nangawis kadagiti kaarruba. Natignay unay ti 80-ãnos a kaarruba iti panagregget dagiti Saksi gapuna nga intugotna ti brutsana ken impilitna ti tumulong. Nangidonar ti amo ti maysa kadagiti boluntario iti alikamen a para iti bentilasion ti paglutuan iti kusina. Sabali pay nga amo ti nangidonar iti pagikkan iti lunglongan. Naawis unay ti maysa a lalaki ta tinarigagayanna ti makaammo iti ad-adu pay maipapan kadagiti Saksi ni Jehova. Sigagagar nga inawatna ti publikasion a Mabalinyo ti Agbiag nga Agnanayon iti Paraiso a Daga.
Nabatad a nakita ti naan-anay a pannakaklaat iti rupa ti biuda ken dagiti annakna apaman a nagsublida. Adda naruay a lulua, ragsak, ken panagiinnabrasa—maysa a di malipatan a kanito ti Nakristianuan nga ayat ken rikna. Wen, ti naisangsangayan nga ayat ken pannakaseknan kadagiti agkasapulan a kameng ti kongregasion ket maysa a pakailasinan iti pudno a Kinakristiano, ta insurat ni Pablo: “Pudno, ngarud, bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti isuamin, ngem nangnangruna kadagidiay nainaig kadatayo iti pammati.”—Galacia 6:10.