“Sinungbatan ni Jehova Dagiti Kararagko!”

ITI intero a lubong, mangikonkondukta dagiti Saksi ni Jehova iti agarup lima milion a panagadal iti Biblia kadagiti tattao nga interesado a gumun-od iti umiso a pannakaammo maipapan iti Dios ken iti nakaskasdaaw a panggepna maipaay iti sangatauan. Makiramraman iti daytoy a trabaho uray dagiti ubbing kadagiti Saksi ni Jehova. Alaentayo a pagarigan ti maysa nga ubing a lalaki nga agnagan Joel. Insimbolona ti dedikasionna ken Jehova ket nabautisaran idi agtawen iti siam. Kalpasan ti makatawen, naaddaan iti kastoy a kapadasan.

“Bayat nga addaak iti ministerio, naam-ammok ti maysa a babai nga agnagan Candy. Intukonko kenkuana ti broshur nga ‘Adtoy! Pagbalinek Dagiti Isuamin a Bambanag a Baro.’ Addaanen iti dayta, isu nga intukonko ti libro a Mabalinyo ti Agbiag nga Agnanayon iti Paraiso a Daga. Addaan metten. Napanunotko, ‘Itukonko iti daytoy a babai ti panagadal iti Biblia.’ Immannugot!

“Immay nakipagnaed ken Candy ti kabsatna a babai a nataninganen ti biagna gapu iti sakit a kanser. Maysa pay, mangal-ala ni Candy iti nursing. Isu a nabayag bassit a naisardeng ti panagadal iti Biblia. Ngem intultuloymi kada tatang ken nanang nga inyegan ni Candy wenno ti asawana, ni Dick, kadagiti magasin. Kinunana kadakami nga idissona dagiti magasin iti abay ti katrena ket basaenna ida iti rabii.

“Idi agangay, natay ti kabsat ni Candy. Kaduak da Tatang ken Nanang a nakisarita ken Candy maipapan iti kasasaad dagiti natay. Inkeddengna nga ituloy ti agadal iti Biblia. Iti sabali nga aldaw, dinamagmi ken Dick no kayatna a duada ken Candy nga agadal kas pamilia. Kinunana a nasayaat dayta. Isu nga ita, iyad-adalanmi ken Tatang da Dick ken Candy. Nasayaat ti panagrang-ayda ket apresiarenda ti panagadalda iti Biblia.

“Inkarkararagko a maaddaanak koma iti iyadalan iti Biblia, ket sinungbatan ni Jehova dagiti kararagko!”