Impaltiing Kadi Amin ti Dios?

TI KADI espiritu ti Dios, a nangipaltiing iti Nasantuan a Biblia, impaltiingna met dagiti sabsabali pay a libro nga ibilbilang dagiti dadduma kas nasantuan? (2 Timoteo 3:16) Naibangon daytoy a saludsod iti maysa a warnakan (La Civiltà Cattolica) dagiti Italiano a Jesuita, a naipablaak “iti sidong ti panangiwanwan ti [Vatican] Secretariat of State” ket ngarud maibilbilang nga addaan autoridad kadagiti Katoliko.

“Ti Dios, babaen ti panagtignay ti Nasantuan nga Espiritu, inwarisna ti bukel ti Sao uray iti dadduma a nasantuan a libro a naglaon iti tradision dagiti di Judio ken di Kristiano,” kinuna ti warnakan dagiti Jesuita. Para kadagiti Jesuita, dagiti “nasantuan” a libro, kas ti Zoroastrian Avesta wenno ti Confucian Four Books, ket naisurat “gapu iti impluensia ti Nasantuan nga Espiritu, ket ngarud, adda linaonda a sangkabassit a ‘nadibinuan a paltiing.’”

Nupay kasta, ilawlawag ti artikulo. “Saan nga amin a linaon dagiti kasta a nasantuan a libro ket sao ti Dios,” kunana, nga innayonna a dagidiay nangisurat kadagitoy a libro nalabit “napasaranda ti impluensia ti politeistiko nga aglawlaw wenno ti pilosopikal a konteksto” a nagbiagan ken nagtignayanda. Sigun ken Marco Politi, agiwarwarnak kadagiti pasamak iti Vaticano para iti periodiko ti Italia a La Repubblica, daytoy a takder “palubosanna ti dati a maibilbilang a maiparit a relasion iti nagbaetan ti Iglesia Katolika ken dagiti dadakkel a nalatak a relihion,” nga isublina ti espiritu a makapagtaripnong nga agkararag dagiti nagduduma a relihion a kas iti napasamak idiay Assisi idi 1986, a sipipinget nga intandudo ni John Paul II.

Ni Jehova ket saan a Dios ti riribuk ken panagsisimparat. (1 Corinto 14:33) Gapuna di umiso a kunaentayo a ti nasantuan nga espirituna, wenno aktibo a puersa, ti mangipaltiing iti uray maysa a paset dagiti aniaman a libro a di naan-anay a maitunos iti Saona, ti Biblia. Imbes nga iparegtana dagiti ekumenikal a panangmatmat iti nagbabaetan ti nagduduma a “narelihiosuan a tradision,” insurat ni Kristiano nga apostol Pablo nga adda “maysa a namnama . . . , maysa nga Apo, maysa a pammati, maysa a bautismo.”​—Efeso 4:4, 5.

Dayta “maysa a namnama” naibatay iti pammati ken Jesu-Kristo. Umiso ti kuna ti Biblia: “Awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.” (Aramid 4:12) Awan sabali a “nasantuan a libro” a mangidatdatag ken Jesus kas kapatgan iti pannakaipatungpal dagiti panggep ti Dios. No laeng awatentayo ti Biblia kas Sao ti Dios a maisuronatayo maipapan iti naayat a probision ni Jehova a Dios maipaay iti pannakaisalakan.​—Juan 17:3; 1 Tesalonica 2:13.