Agpegpeggad ti 403-Tawen a Panagkadua
IDIAY Sweden, nasuroken nga 400 a tawen a tinagiragsak ti Simbaan ken ti Estado ti nadekket a relasion. Ita kumapkapuyen ti panagkadua ti relihion ken ti gobierno.
Naipasdek ti Lutheranismo kas relihion ti Estado idi 1593, ket amin a Sueko kasapulan idi nga agpabuniag. Kalpasan ti adu a tawen, idi dekada 1850, adda naaramid a panagbalbaliw. Saanen a nasken a mabuniagan dagiti Sueko; nupay kasta, maibilangda pay laeng a kameng ti Iglesia a Lutherano. Gapu ta kasta, makalikaguman ti panangtedda iti 1 porsiento iti mabuisan a masapulanda tapno masuportaran ti simbaan ken tapno pagbayad kadagiti serbisio sibil nga ipapaay ti simbaan. Iti di pay unay nabayag maysa pay a panagbalbaliw ti napasamak. Nangrugi idi 1952, legal a makapaglusulos dagiti Sueko iti simbaan ket iti kasta saandan nga agbayad iti dakkel a paset iti buis ti simbaan.
Kadagitoy nabiit pay a tawen nagtultuloy a kimmapuy ti kontrol ti Iglesia a Lutherano iti Sweden. Di naliklikan dayta, yantangay 10 porsiento kadagiti agnaed iti Sweden ket saan a Lutherano nga immakar, a pakairamanan dagiti Judio, Katoliko, ken Muslim. Gapuna, idi rugrugi ti 1996, 86 porsiento laengen kadagiti Sueko ti karaman iti Iglesia a Lutherano, ken agtultuloy a bumasbassit.
Ti lumanlanlan a kinaawan-interes ti mangpadpadakkel iti giwang iti nagbaetan ti Simbaan ken Estado. Naideklara itan a saanen a nasken a ti ari ket maysa a Lutherano, ket ti annak dagiti Lutherano saanen nga automatiko a maibilang a kameng ti Lutheran State Church. Maysa pay, sigun iti The Dallas Morning News, inton tawen 2000, “masapul a kuentaen ken bingayen dagiti lokal a parokia ken ti estado ti dakkel a kantidad ti sanikua. Masapul a kissayan ti iglesia ti $1.68 bilion a tinawen a badyetna, a kaaduanna ti maur-urnong babaen kadagiti buis.” Kalpasan daytoy a siglo, ti iglesian ti mangdutok kadagiti bukodna nga obispo.
Bayat a masapsaplit ti Kakristianuan iti kinaawan-interes ken bumasbassit a kameng, agtultuloy nga umad-adu dagiti Saksi ni Jehova idiay Sweden. Ireport ti 1997 Yearbook of Jehovah’s Witnesses nga adda 24,487 nga agibumbunannag iti Pagarian ti Dios iti dayta a pagilian, ket gistay 10 porsiento ti mangaskasaba kas amin-tiempo a ministro a payunir. Adu kadagitoy ti mangikagkagumaan a mangragpat kadagiti ad-adu pay a pribilehio iti serbisio. Kas pagarigan, kadagiti kombension distrito dagiti Saksi ni Jehova idi 1995, 20 a pagassawaan ti nangisubmitir iti aplikasion maipaay iti panagsanay kas misionero iti Watchtower Bible School of Gilead. Iti dayta a tiempo, addan agarup 75 a nagturpos a Sueko kadagiti napalabas a klase nga agserserbi itan kas misionero iti nadumaduma a paset ti lubong. Di pagduaduaan a ti nasayaat nga ulidan ken makaparegta a surat ken isasarungkarda ti mangtignay kadagidiay agngayngayangay ita iti daytoy naindaklan a pribilehio.
Gapuna, bayat a maup-upay ti minilion iti Kakristianuan, dagiti Saksi ni Jehova ket ‘agkankanta a gapu iti rag-o ti puso.’—Isaias 65:13, 14.
[Mapa iti panid 30]
(Para iti aktual a pannakaurnosna, kitaem ti publikasion)
Sweden