Panangibaklay iti Sangol iti Kinaagtutubo

KADAGITOY “napeggad a tiempo a narigat a pakilangenan,” sanguen dagiti agtutubo ti nadadagsen a pakarigatan. (2 Timoteo 3:1) Inaldaw a mapaspasanguanda kadagiti propaganda a mangiparparegta iti imoralidad, panagsigarilio, ken dadduma pay a makadadael a kababalin. Mabalin a malalais dagidiay mangsurot kadagiti pagalagadan iti Biblia gapu ta agkedkedda a makidanggay iti bunggoy, ket mabalin a marikna ti dadduma a Kristiano a nalaklaka ti tumulok.

Idi arinunos ti maikapito a siglo K.K.P., insurat ni Jeremias: “Naimbag iti tao nga awitenna ti sangol iti kinaagtutubona.” (Un-unnoy 3:27) Ania ti kayatna a sawen? A ti panagsursuro a mangsaranget kadagiti pakasuotan bayat ti kinaagtutubo tulonganna ti maysa nga agsagana a mangsaranget kadagiti karit ti kinanataengan. Dagiti pakarigatan, nupay di makaay-ayo, ket di maliklikan dagiti Kristiano nga agtutubo ken nataengan. (2 Timoteo 3:12) Ngem dagiti pagimbagan ti kinamatalek ad-adda a rimbawanna ti aniaman a temporario a bang-ar a mabalin nga iyeg ti pannakikompromiso.

No maysaka nga agtutubo, situtured a sarangtem dagiti pakasuotan ti pammati. No sulisogendaka nga agaramid iti di umiso, dika makikompromiso. Nupay mabalin a narigat ita nga aramiden daytoy, inton agangay, basbassitto ti pakaringgoram. Inkari ni Jesus: “Ibaklayyo ti sangolko . . . , ket makasarakkayto ti bang-ar a maipaay kadagiti kararuayo. Ta ti sangolko naasi ken ti awitko nalag-an.”​—Mateo 11:29, 30.

Awatem ti karit ti panagbiag a maitunos kadagiti prinsipio ti Biblia. Ti panangaramid iti kasta itdenna kenka ti kasayaatan a panagbiag itan ken ti sigurado a namnama iti masanguanan. Kas kuna ti Biblia, “ti lubong aglabas ken kasta met ti tarigagayna, ngem ti mangaramid iti pagayatan ti Dios agtalinaed iti agnanayon.”​—1 Juan 2:17.