Dagiti Makagunggona a Rabii a Di Pannakaturog
URAY dagiti ari adda dagiti rabii a saanda a makaturog. Napasaran daytoy ti nabileg nga agturay a Persiano idi maikalima a siglo K.K.P., ni Asuero. Nalabit nariknana nga adda naliwayanna a rebbengna nga aramiden, impaibasana dagiti naarian a rekord. Naammuanna a maysa a matalek nga adipen, ni Mardokeo, ti nanglapped kadagidiay nagpanggep a mangpapatay [iti ari] ngem saan pay a nagunggonaan. Inkeddeng ni Asuero nga ilinteg a dagus daytoy a pannakaliway. Dagiti nasayaat nga epekto ti panagtignayna iti ili ti Dios ipamatmatna a ti di pannakaturog ti ari ket gapuanan ti Dios.—Ester 6:1-10.
Ti kongregasion dagiti Saksi ni Jehova iti ili ti Hermanus nga adda iti kosta ti Sud Africa adda panggapuanda a manglagip iti daytoy a paset ti Biblia. Dati nga agtataripnongda iti maysa a maab-abangan a pasdek. Adu a tawen nga inkagumaanda ti gumatang iti daga a pangipatakderanda iti bukodda a Kingdom Hall. Kamaudiananna, idi 1991, intukon ti Konseho ti Ili ti maysa a nagsayaat a lugar.
Nupay kasta, sinupiat ti dadduma ti pannakailako daytoy a lugar kadagiti Saksi ni Jehova. Kalpasan ti pannakaitantan iti sumagmamano a bulan, naipakaammo iti kongregasion nga adda naikeddeng a tallo-tawen a moratorium iti pannakailako ti daga kadagiti iglesia, ket naibabawi ti tukon a daga. Idi Mayo 1993 nagsurat manen ti kongregasion, a kiniddawda iti konseho nga usigenda manen ti pangngeddengda. Nakaab-ababa ti sungbat iti surat a naawatda, a mangibagbaga a maipatpatungpal pay laeng ti moratorium.
Idi Oktubre iti dayta a tawen, iti maysa a rabii di makaturog ti maysa kadagiti konsehal ti ili. Pinalabasna ti oras babaen ti panangrepasona kadagiti daan nga opisial a rekord iti miting tapno maammuanna no adda aniaman a banag a kasapulan a maipaayan iti atension. Naipamaysa iti atensionna ti surat dagiti Saksi nga agkidkiddaw iti konseho nga usigenda manen ti desisionda. Gapuna inkeddengna nga iraman daytoy a banag kadagiti mapagsasaritaan iti sumaganad a mitingda. Kayatna nga ipakita a nagaplikar dagiti Saksi ni Jehova maipaay iti daga sakbay pay a naikeddeng ti moratorium iti daga para kadagiti iglesia.
Idi agangay, naited iti kongregasion ti isu met laeng a daga a naitukon kadakuada idi 1991! Adda daytoy iti kangrunaan a kalsada, a nalaka a papanan dagiti miembro ti kongregasion ken interesado. Nakaipatakderda iti napintas a Kingdom Hall, a naidedikar ken Jehova idi Oktubre 5, 1996.
Nupay ladingiten ti kongregasion ti pannakaringgor ti konsehal iti daydi rabii a di makaturog, mabalin a naliwliwa a nakaammo nga uray ni Ari Asuero adda met idi rabii a di makaturog. Ket agpada a makagunggona ti resulta dagitoy. Di pagduaduaan a kasta unay ti ragsak ti kongregasion ti Hermanus iti pannakaadda iti bukodda a Kingdom Hall, a sentro ti nadalus a panagdaydayaw ken teokratiko a panagsanay iti daytoy nalatak nga ili iti kosta.—Hebreo 10:24, 25.