Nakaaritos iti Balitok

MANIPUD pay idi un-unana, maipatpateg unay ti alahas a balitok gapu iti balor ken pintasna. Idi nagbalin ni Jose a kangatuan a ministro iti Egipto, inikkan ni Faraon iti kuwentas a balitok. (Genesis 41:42) Naikkan idi ni Rebeca iti balitok a singsing ti agong ken dua a pulseras a balitok, nga agpateg ita iti $1,400 (E.U.). (Genesis 24:22) Di pagduaduaan a siyayaman nga inawat ken siraragsak nga insuotda dagitoy nga agkakapateg a sagut.

Saritaen ti Biblia ti maipapan iti piguratibo nga alahas a napatpateg nga amang ngem kadagidi insuot da Jose ken Rebeca. Kuna ti Proverbio 25:12: “Kas aritos a balitok, ken alahas a nasudi a balitok, kasta ti masirib a mangtubngar iti natulnog a lapayag.” No mangipaay ti maysa a mammagbaga iti balakad a naibatay iti Sao ti Dios imbes nga iti bukodna a kapanunotan, pudno a mangmangted iti napateg a sagut. Apay? Agsipud ta ni Jehova a mismo ti paggapuan ti kasta a pammagbaga. Kunaen ti Biblia kadatayo: “Anakko, dika laisen ti pammagbaga ni Jehova; dika met mauma iti panangtubngarna; ta ti ay-ayaten ni Jehova tubngarenna; kas met laeng maysa nga ama iti anakna a pagay-ayatanna.” (Proverbio 3:11, 12) No ti agdengdengngeg sipapakumbaba nga awaten ken iyaplikarna ti pammagbaga, arigna nakaaritos iti balitok. Kas kuna ti naipaltiing a proverbio iti Biblia: “Naragsak ti tao a makasarak iti sirib, ken ti tao a makaala iti pannakaawat. Ta ti pannakagun-od kenkuana nasaysayaat ngem pannakagun-od iti pirak, ket ti magunggona kenkuana nasaysayaat ngem balitok a nasudi.”​—Proverbio 3:13, 14.