Malagipyo Pay Aya?

Inapresiaryo kadi ti nagbasa kadagiti nabiit pay a ruar ti Pagwanawanan? Bueno, kitaenyo no masungbatanyo dagiti sumaganad a saludsod:

◻ Ania ti kangrunaan a panggep ti edukasion para iti Kristiano nga agtutubo?

Ti kangrunaan a panggep ti edukasion isu ti panangtulong iti agtutubo nga agbalin nga epektibo a ministro ni Jehova. Ket ti kapatgan nga edukasion tapno magun-od dayta a kalat isu ti naespirituan nga edukasion.​—8/15, panid 21.

◻ Ania dagiti makagapu nga ipulong kadagiti panglakayen ti nadagsen a basol ti pada a Kristiano?

Ti maysa a makagapu iti panangipulong iti nadagsen a basol ket tapno masalimetmetan ti kinadalus ti kongregasion. Ti maysa pay a makagapu ket ti panangaramid iti kasta pakakitaan ti Nakristianuan nga ayat a naibatay iti prinsipio a maipaay iti Dios, iti kongregasion, ken iti nakabasol.​—8/15, panid 28, 30.

◻ Ania ti kayat a sawen ti panagtalinaed a “silalagip unay iti kaadda ti aldaw ni Jehova”? (2 Pedro 3:12)

Kaipapananna a ditay iwaksi “ti aldaw ni Jehova” iti panunottayo. Ditay koma liplipatan a nakaas-asidegen ti aldaw a panangdadael ni Jehova iti daytoy a sistema ti bambanag. Rebbengna a napaypayso dayta kadatayo a kasla adda iti sanguanantayo a nalawag a makita. (Sofonias 1:7, 14)​—9/1, panid 19.

◻ Apay a napapaut ti panagtultuloy dagiti maudi nga al-aldaw daytoy dakes a sistema ngem ti ninamnama ti adu?

Ammo ni Jehova ti kasayaatan para iti intero a sangatauan. Maseknan iti biag dagiti tattao. (Ezequiel 33:11) Makapagtalektayo a dumtengto ti panungpalan iti maitutop a tiempo tapno matungpal ti panggep ti masirib unay, naayat a Namarsua kadatayo.​—9/1, panid 22.

◻ Kasano a dagidiay adda iti amin-tiempo a serbisio mataginayonda ti rag-oda iti laksid dagiti parikut a pakaipasanguanda?

Rumbeng a panunotenda ti adu a bendision nga adda kadakuada ken panunotenda a rinibu a sabsabali pay ti agsagsagaba iti nakarkaro a rigat. (1 Pedro 5:6-9)​—9/15, panid 24.

◻ Ania ti kalat ni William Tyndale a nangipatarus iti Biblia?

Kayat ni Tyndale a mabasa ti gagangay a tao ti Kasuratan iti sasao nga umiso ken simple aginggat’ mabalin.​—9/15, panid 27.

◻ Kasanotay a maipakita a nasungdotayo a manangitandudo iti Sao ti Dios?

Maipakitatayo ti kinasungdotayo iti Sao ti Dios babaen ti sireregta a panangikasaba iti dayta kadagiti sabsabali. Kas mannursuro, usarentay koma ti Biblia a siaannad, a ditay tirtiritiren wenno nayonan ti ibagbagana tapno mayataday kadagiti kapanunotantayo. (2 Timoteo 2:15)​—10/1, panid 20.

◻ Kasano a ti makasabidong nga espiritu ti lubong mapakapuyna ti kinatarnawtayo?

Ti espiritu ti lubong mapakapuyna ti kinatarnawtayo babaen ti panamagbalinna kadatayo a di mapnek iti adda kadatayo ken sipapanunot a nangnangruna kadagiti bukodtayo a kasapulan ken pagimbagan imbes a ti pagayatan ti Dios. (Idiligyo ti Mateo 16:21-23.)​—10/1, panid 29.

◻ Ania ti kayat a sawen ti panagserbi ken Jehova iti amin a kararua?

Ti “kararua” tumukoy iti tao a mismo, agraman amin a pisikal ken mental nga abilidadna. Ti panagserbi ken Jehova iti amin a kararua kaipapananna ti panangipaay iti bagbagitayo, panangusar a naan-anay iti amin a kabaelantayo ken pigsatayo iti panagserbi iti Dios. (Marcos 12:29, 30)​—10/15, panid 13.

◻ Ania ti tulbek iti panagbalin a tao nga addaan nadiosan a prinsipio?

Ti tulbek ket ti pudpudno a panangammo ken Jehova, dagiti kayatna, dagiti dina kayat, ken dagiti panggepna. No dagitoy napapateg a banag maipapan iti Dios ti mangiwanwan iti biagtayo, kinapudnona, agbalinda a sibibiag a prinsipio. (Jeremias 22:16; Hebreo 4:12)​—10/15, panid 29.

◻ Addaan dagiti adipen ni Jehova iti ania a balanse a panangmatmat iti turay ti tao?

Neutralda kadagiti napolitikaan a banag gapu ta agserserbida kas embahador wenno mensahero ti Pagarian ti Dios. (2 Corinto 5:20) Iti sabali a bangir, sipapasnek nga agpaspasakupda kadagidiay addaan autoridad.​—11/1, panid 17.

◻ Ania ti maadaltayo iti inaramid ni propeta Elias?

Idi naayaban maipaay iti naisangsangayan a serbisio a kadua ni Elias, pinanawan a dagus ni Eliseo ti talonna tapno agserbi ken Elias, nupay nanumo laeng ti dadduma kadagiti annongenna. (2 Ar-ari 3:11) Dadduma kadagiti ministro ti Dios itatta ti nangipakita iti umasping nga espiritu ti panagsakripisio babaen ti panangpanawda kadagiti pagsapulanda tapno ikasabada ti naimbag a damag kadagiti adayo a teritoria.​—11/1, panid 31.

◻ Ania a makagunggona a balakad ti linaon ti surat ni Santiago?

Ipakitana kadatayo no kasano a sanguen dagiti pakasuotan, balakadannatayo maibusor iti paboritismo, ken paregtaennatayo a mangaramid iti naimbag. Gutugotennatayo ni Santiago a medmedantay ti dila, sarangten dagiti nailubongan nga impluensia, ken itandudo ti talna. Ti sasaona tulongannatay met nga agbalin a naanus ken managkararag.​—11/15, panid 24.

◻ Apay a ‘sisasagana a mamakawan’ ni Jehova? (Salmo 86:5)

Sisasagana a mamakawan ni Jehova gapu ta silalagip a naparsuatayo iti tapok, nga addaan kadagiti pagkurangan, wenno pagkapuyan, kas resulta ti kinaimperpekto. (Salmo 103:12-14)​—12/1, panid 10, 11.

◻ Apay a rumbeng a sibubulos a pakawanentayo dagiti sabsabali?

No ditay pakawanen dagiti sabsabali idinto ta adda pagibatayan iti asi, apektaranna unay ti relasiontayo iti Dios. (Mateo 6:14, 15)​—12/1, panid 17.