Tinawen a Miting Oktubre 3, 1998

MAANGAY TI TINAWEN A MITING dagiti miembro ti Watch Tower Bible and Tract Society of Pennsylvania inton Oktubre 3, 1998, idiay Assembly Hall of Jehovah’s Witnesses, 2932 Kennedy Boulevard, Jersey City, New Jersey. Maangay ti umuna a miting dagiti miembro laeng iti alas 9:15 t.b., a sarunuen ti pangkaaduan a tinawen a miting iti alas 10:00 t.b.

Dagiti miembro ti Korporasion rebbeng a pakaammuanda ti Opisina ti Sekretario itan iti aniaman a panagbalbaliw ti pakaipatulodan ti suratda bayat ti napalabas a tawen tapno dagiti regular a surat a panangipakaammo ken dagiti proxy dumanon kadakuada inton Hulio.

Dagiti proxy, a maipatulod kadagiti miembro agraman pakaammo ti tinawen a miting, masapul a maisublida tapno makagteng iti Opisina ti Sekretario ti Sosiedad a saan a naladladaw ngem Agosto 1. Tunggal miembro rumbeng a kompletuen ken isublina nga insigida ti proxy-na, nga ibagana no personal nga addanto iti miting wenno awan. Ti impormasion a naited iti kada proxy rebbeng a piho iti daytoy a punto, ta daytat’ pangdeterminaran no siasino dagiti personal nga addanto.

Ti intero a sesion, agraman ti pormal a miting ti korporasion ken dagiti report, manamnama nga agpatingga iti ala 1:00 t.m. wenno di agbayag kalpasanna. Awan ti sesion iti malem. Gapu iti limitado nga espasio, ti makastrek ket babaen iti tiket laeng. Awan dagiti urnos a panangikonektar iti tinawen a miting babaen kadagiti linia ti telepono iti dadduma nga auditoriom.