Nagkaykaysa iti Kasayaatan a Wagas ti Panagbiag

Nagkaykaysa iti Kasayaatan a Wagas ti Panagbiag

No agtultuloy nga umadu ti populasion ti lubong, iti saan a mabayag addanton innem a bilion a tattao ditoy daga. Nupay maymaysa ti kapuonan ti amin a tao, agparang a di bigbigen ti kaaduan a kameng ida ti sangalubongan a pamilia ken manungsungbatda iti masirib ken naayat a Namarsua. Ti kinaawan panagkaykaysa ken di panagtutunos dagiti nasion, puli, ken kultura ket nakas-ang a pammaneknek iti daytoy a nakalkaldaang a kasasaad.

GAPU kadagiti agdama a kasasaad iti lubong, kasla saan a matun-oy ti sangalubongan a panagkaykaysa. Kuna ti The Columbia History of the World: “Maipapan iti nagpateg a saludsod no kasano ti agbiag a sangsangkamaysa, awan a pulos ti maipaay ti agdama a lubong a baro a kapanunotan.”

Nupay kasta, saan a kasapulan ti baro a kapanunotan tapno mapagkaykaysa dagiti amin nga agnaed iti daga. Naipakita iti Nasantuan a Kasuratan ti dana nga agturong iti panagkaykaysa. Nakasentro dayta iti panagdayaw iti Namarsua iti daga ken amin nga agbibiag iti dayta. Sagsagrapenen ti ili ti Dios ti pudno a panagkaykaysa iti panunot, panggep, ken wagas ti panagbiag. Agdagupda itan iti nasurok a lima ket kagudua a milion iti 233 a pagilian. Nagkaykaysada iti pammati a ti dalan ti Dios iti biag ti kasayaatan a dalan. Kas iti salmista, ikarkararagda: “Isurom kaniak ti dalanmo, O Jehova; kayatko ti magna iti kinapudnom: pagkaykaysaem toy pusok tapno agbuteng ita naganmo.”—Salmo 86:11.

Idi pay un-unana a panawen nga impadto ni propeta Isaias daytoy a panagkaykaysa dagiti tattao iti nasin-aw a panagdayaw. Insuratna: “Maaramidto kadagiti maud-udi nga al-aldaw, a ti bantay ti balay ni Jehova mabangonto iti rabaw dagiti bambantay, ket maibayogto a nangnangruna ngem kadagiti turturod; ket isuamin a nasion agayusdanto agingga kenkuana. Ket adu dagiti inilin-ili a mapanto ken agkuna, Umaykayo, ket sumang-attayo iti bantay ni Jehova, iti balay ti Dios ni Jacob; ket isuronatayonto kadagiti dalanna, ket magnatayonto kadagiti danana.”—Isaias 2:2, 3.

Naisangsangayan ti panagkaykaysa dagiti Saksi ni Jehova. Iti nasurok a 87,000 a kongregasion iti intero a lubong, pareho a naespirituan a taraon ti aw-awatenda kadagiti linawas a gimongda. (Mateo 24:45-47) Nupay kasta, manipud idi ngalay ti 1998 agingga iti rugrugi ti 1999, imparangarang dagiti Saksi ti panagkaykaysada iti sabali pay a pamay-an—babaen ti panagtataripnongda iti tallo-aldaw a “Dalan ti Dios iti Biag” a Kombension iti intero a lubong. Iti 13 a pagilian, timmabuno kadagitoy a panagtataripnong dagiti nakaad-adu a delegado a naggapu iti nagduduma a dagdaga ket naawagan dagitoy iti internasional a kombension. Naawagan dagiti dadduma iti kombension distrito. Ngem agpapada nga agkakaimbag a naespirituan a banag ti naidatag iti programa dagitoy a kombension.

Anian a nakaay-ayat a maimatangan dagiti nararagsak, natatakneng panagkawkawesda a delegado a nagturong kadagiti auditorio ken istadium tapno umawatda iti pannursuro ni Jehova! Kastoy ti kinuna ti maysa a delegado iti internasional a kombension a naangay idiay Michigan, E.U.A.: “Makaparagsak a makita ti panagiinnarakup dagiti kakabsattayo a naggapu iti nagduduma a paset ti lubong—Czech Republic, Barbados, Nigeria, Hungary, Inglatera, Holland, Ethiopia, Kenya, ken adu a dadduma pay a pagilian! Nagsayaat a kitaen ti panagtitimpuyog dagiti kakabsat iti kinamaymaysa, a nakaragragsak nga uray la nakaluada gapu iti ayatda iti maysa ken maysa ken iti naindaklan a Diosda, ni Jehova.” Sukimaten ti sumaganad nga artikulo ti programa ti kombension a sinagrap ti minilion a tattao iti intero a daga.

[Picture Credit Line iti panid 3]