Kinaranggas—Asidegen nga Agpatingga iti Agnanayon!
“Ti Kinaranggas Pagpeggadenna ti Nasion”—The New York Times, Estados Unidos.
“Kinaranggas iti Pagtaengan”—O Globo, Brazil.
“Ti Kinaranggas Butbutngenna Dagiti Babbai iti Sangalubongan”—The Globe and Mail, Canada.
DAGITOY a paulo ti damag kadagiti pagiwarnak idiay Makin-amianan ken Makin-abagatan nga America ipamatmatda ti makapadanag a kasasaad iti intero a lubong. Kas kinuna ti World Health Organization iti di pay nabayag, “limmanlan iti kasta unay ti amin a kita ti kinaranggas kadagiti kallabes a dekada.”
Usigenyo ti sumagmamano a makapadanag nga estadistika:
Pammapatay. Idiay Latin America ken iti Caribe, agarup 1,250 a tattao ti siraranggas a mapappapatay iti kada aldaw. Kas bungana, “iti kagudua kadagiti pagilian iti dayta a rehion, pammapatay ti maikadua a kangrunaan a pakaigapuan ti ipapatay dagiti agtutubo nga agtawen iti 15-24.”
Kinaranggas kadagiti ubbing. Problema iti intero a lubong ti pisikal, seksual, ken emosional a panangabuso kadagiti ubbing. Kas pagarigan, “ipasimudaag dagiti surbey mainaig kadagiti nataengan iti sumagmamano nga industrialisado a pagilian a 10%–15% kadagiti ubbing ti biktima ti seksual a panangabuso—a kaaduan kadakuada ket babbai.”
Kinaranggas kadagiti babbai. Kalpasan ti panangusigda kadagiti naaramid a panangabuso iti natauan a kalintegan iti intero a lubong idi 1997, kinuna dagiti managsirarak a ti “kinaranggas iti pagtaengan ti maysa kadagiti kangrunaan a pakaigapuan ti pannakadangran dagiti babbai iti gistay amin a pagilian ditoy lubong.” (Human Rights Watch World Report 1998) Ti kinaranggas iti pagtaengan, a nasaknap ngem saan unay a mairepreport a parikut, ket maaw-awagan itan a “ti naulimek a krisis iti maika-20 a siglo.”—The Globe and Mail, Canada.
Idi kaaldawan ni Noe, “napno [met ti daga] iti ranggas.” (Genesis 6:9-12) Ngem insalakan ni Jehova a Dios dayta a “manangaskasaba iti kinalinteg” ken ti sangakabbalayanna “idi inyegna ti layus iti lubong dagiti di nadiosan a tattao.” Kastanto met ti aramiden ti Dios iti kaaldawantayo. Isalakannanto “dagiti tattao nga addaan nadiosan a debosion” inton ikkatenna dagiti naranggas ken managdakdakes ket pagbalinenna a paraiso daytoy daga iti baro a lubong nga inkarina. (2 Pedro 2:4-9; 3:11-13) Dikay kadi maragsakan a makaammo nga asidegen nga agpatingga iti agnanayon ti kinaranggas?