Giya iti Panangpili iti Nasayaat a Kakadua

NANGNANGRUNA nga agpaiwanwan dagiti agtutubo kadagiti kataebda ngem kadagiti dadakkelda no maipapan iti panagkawkawes ken musika, kuna ti maysa a report iti Reader’s Digest. Napateg ngarud nga ammuen dagiti nagannak no asino ken sadino ti pakikadkaduaan dagiti annakda.

“Rebbengem ti agpalutpot,” kuna ni Esmé van Rensburg, senior lecturer iti departamento ti psychology iti maysa nga unibersidad ti South Africa. Innayonna: “Nalabit marurod kadakayo ti annakyo, ngem bumaawdanto met laeng.” Sa insingasingna kadagiti nagannak dagiti sumaganad. Nainkalintegan koma ken addaan iti masnup a prinsipio a nakaibatayan dagiti pagannurotan; umimdengka iti anakmo; dika agpungtot, no di ket agkalmaka, ket panunotem no ania ti kayatmo nga ibaga. No nakigayyemen ti anakmo iti di nasayaat a katimpuyog, iturongmo ti atensionna kadagiti di umiso a kababalin nga imbunga ti kasta a pannakigayyem imbes a basta paritam ti pannakikadkaduananto pay.

Nabayagen nga adda iti Biblia a Sao ti Dios ti nasayaat a balakad para kadagiti nagannak. Kas pagarigan, kunana: ‘Nasiglat[kayo] koma maipapan iti panagdengngeg, nainayad maipapan iti panagsao, nabannayat maipapan iti panagpungtot.’ (Santiago 1:19) Kastoy pay ti nasayaat a balakad ti Kasuratan maipapan iti panagpili kadagiti kakadua: “Makikuyogka kadagiti masirib a tattao, ket masiribkanto; ngem ti makikuyog kadagiti maag pagsikorannanto.” (Proverbio 13:20) Iladawan dagitoy a pagarigan ti sirib a magun-od dagiti agbasbasa iti Biblia a nabuyogan ti panangipateg ken panangyaplikar iti ibagbagana iti inaldaw a panagbiag.