“Ti Isasarungkarko iti Kingdom Hall”

Ni Laura,a a maysa a kolehiala, ket natudingan a tumabuno iti maysa a relihioso a taripnong sa mangaramid iti report maipapan iti dayta. Pinilina dagiti Saksi ni Jehova, ket pinauluanna ti salaysayna a “Ti Isasarungkarko iti Kingdom Hall.” Ania ti nasarakan ni Laura a nakaidumaan dagiti Saksi? Dagiti sumaganad ti sumagmamano kadagiti adu a banag a dinakamatna.

Ubbing: “Adda amin dagiti ubbing iti maymaysa a siled kas kadagiti nataengan. Iti amin a simbaan a tinabunuak, sumina dagiti ubbing kadagiti dadakkelda ket agatenderda iti Sunday School.”

Panagkaykaysa iti puli: “Gagangay a dagiti simbaan awisenda dagiti kameng ti maysa a puli wenno etniko a grupo. . . . Ngem kadagiti Saksi ni Jehova, agkakatugawda amin ken awan ti panaglalasinlasin.”

Kinamanagpasangbay: “Adu ti immasideg ken nakisarita kaniak. . . . Nagsaludsod pay ketdi ti dadduma no adda mangyad-adal iti Biblia kaniak. Kaskasdi, diak marikna a pilpilitendak. Binay-andak nga agdesision.”

Awan panagkolekta: “Pudno a namagsiddaaw kaniak ti banag nga awan ti nagkolekta iti kuarta para iti simbaan. . . . Nagur-or dagiti simbaan a napanakon uray kadagiti klase dagiti ubbing.”

Adda agarup 90,000 a kongregasion dagiti Saksi ni Jehova iti sangalubongan. Apay a dikay bisitaen ti maysa kadagitoy a kaasitgan kadakayo?

[Footnote]