Panangsango Kadagiti Karit ti Panangpadakkel iti Annak
DAKKEL a karit kadagiti nagannak ti mangpadakkel iti ubbing ita nangnangruna kadagidiay adda iti tawen ti kinatin-edyer. Impadamag ti The Gazette ti Montreal, Canada, a “gagangayen kadagiti agtutubo” ti panageksperimento iti arak ken droga. Inyunay-unayna nga addaan dagiti nagannak “iti rebbengen a mangsiput iti panagbalbaliw ti tigtignay ti annak[da] a tin-edyer.”
Ania ti siputan dagiti nagannak a mabalin a mangipasimudaag iti kakasta a parikut dagiti agtutubo? Ti sumagmamano kadagiti mangpakdaar a pagilasinan iti pisikal, emosional, ken sosial a dinakamat ti American Academy of Child and Adolescent Psychiatry ket iramanda ti naynay a pannakabannog, panagbaliw ti personalidad ken tigtignay, kanayon nga agpupok iti kuarto, mannakiriri, ken kinadelingkuente.
Kasano a masalakniban dagiti nagannak ti annakda iti kasta a makadangran a panageksperimento ken kadagiti dakes a pagbanaganna? Patien ni Dr. Jeffrey L. Derevensky, iti McGill University, a ti nawaya a panagsasarita ken panangpatanor iti panagririnnaem kabayatan dagiti tawen ti panagdakkel ti ubing ket mabalin a mangkissay kadagiti parikut inton agangay. Innayon ti The Gazette nga uray dumakkel ti tarigagayda nga agwaywayas bayat ti kinaagtutubo, agtultuloy a kasapulan dagiti tin-edyer “ti pannarabay, saranay, urnos, ken ayat nga ipapaay dagiti dadakkelda.” Dagitoy a kapaliiwan ket maitunos iti kuna ti maysa a proverbio iti Biblia: “Iruammo ti ubing iti dalan a rebbengna a papanan, ket uray intono lakayen saannanto a pagpanawan.” (Proverbio 22:6) Balakadan ti Dios dagiti nagannak nga agbalinda a pagwadan, gayyem, mannakikomunikar, ken mannursuro.—Deuteronomio 6:6,7.