Asino ti Mamagpatingga iti Kinaranggas?

IDI Setiembre 1999, inabrasa ni UN Secretary-General Kofi Annan dagiti delegado iti maika-54 a tinawen a sesion ti General Assembly. Kas inreport ti The Toronto Star, kinaritna dagiti panguluen ti lubong, idi a kunana: “Saan la nga ebkas ti pannakipagrikna dagiti pagilian ti kasapulan ti adu unay a tattao. Masapulda ti napaypayso ken mapangnamnamaan a kari a mamagpatingga iti awan sardayna a kinaranggas a mapaspasaranda, ken natalged a mangiturong kadakuada iti kinarang-ay.”

Maipaay kadi ti UN ken dagiti kamengna a pagilian ti “napaypayso ken mapangnamnamaan a kari” a kasapulan tapno agpatingga ti kinaranggas? Iti naadaw met la a report ti Star, kinuna ti presidente ti E.U. a ni Bill Clinton: “Kalpasan ti amin a panangibuyat iti dara iti daytoy a siglo, ammotayo a nalaka la ti mangikuna iti ‘dinto pulos mauliten,’ ngem narigrigat nga amang nga aramiden.” Innayonna: “Agpadpada a makadadael ti nalabes a kari ken ti kinaawan pannakaseknan.”

Nasurok a 2,500 a tawenen ti napalabas, kinuna ni propeta Jeremias maipapan iti panagbannog ti tao: “O Jehova, ammok a ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” (Jeremias 10:23) No kasta, agpatingganto pay ngata ti kinaranggas?

Kas mabasatayo iti Isaias 60:18, impasigurado ti Dios: “Ti panagrabsut (‘kinaranggas,’ NW) dinto mangngegen iti dagam, ti pannakarakrak ken pannakarba kadagiti beddengmo.” Damo a natungpal dayta a padto idi insubli ti Dios ti naidestiero nga ilina iti daga a nakayanakanda. Adda met ti dakdakkel a kaitungpalan dayta a mabalintay a matagiragsak. Saan nga ‘agkarkari iti nalabes’ ni Jehova a Dios. Kas Kangatuan ken Namarsua iti sangatauan, isu ti makabael a mamagpatingga iti “awan sardayna a kinaranggas.” Iti sidong ti Pagarian ti Dios, agarinto ti talna. Awanton ti kinaranggas​—iti agnanayon!​—Daniel 2:44.