Pakaidayawan ti Dios Dagiti Nasayaat nga Aramid
DAGIDIAY agayat iti Dios ikagumaanda nga iyanninaw ti naespirituan a lawag manipud iti Saona, ti Biblia. Iti kasta, sursurotenda ti bilin ni Jesus: “Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.” (Mateo 5:16) Ti sao ken ti nalinteg a kababalin ket pakaidayawan ti Dios.
Kayat dagiti Saksi ni Jehova a maay-ayo ti Dios babaen ti panagbiagda a maitunos iti Biblia ken ti panagreggetda a tumulong kadagiti dadduma iti naespirituan. Aramidenda dayta uray kadagiti pagilian a sadiay maiparit ti panangasabada iti publiko. Iti kabesera a siudad ti maysa kadagita a pagilian, ang-angayen dagiti Saksi ti tinawen a kombension a tabtabunuan ti agarup 6,000 agingga iti 9,000 a tattao. Abanganda dagiti pagpabuyaan a pasdek agpaay kadagiti kasta a taripnong. Sakbay ti kombensionda idi 1999, ginasut a Saksi ti nagsakripisio a nangdalus kadagiti pasilidad ken nangiplastar iti sound system ken rinibu a pagtugawan kas iti inar-aramidda iti naglabas a tawtawen.
Addada nakapaliiw iti daytoy a panagsagana—dagiti opisial ti pasdek. Nadlawda met a naannayas ti pannakaangay ti amin a bambanag ken nakaur-urnos dagiti Saksi nupay adda 15,666 a kangatuan a bilang dagiti timmabuno. Naragsakan met dagiti opisial iti naan-anay a panagdalus dagiti Saksi kalpasanna.
Inapresiar dayta dagiti opisial babaen ti panangikabilda kadagiti Saksi iti listaan dagiti maikkan iti prioridad a mangabang iti pasdek iti sumaganad a tawen. Ngem saan la a dayta ti inaramid dagiti opisial. Idi Hulio 15, 1999, impaayda iti komite ti kombension ti maysa a plake ti apresasion. Naikitikit iti dayta a plake dagiti sasao a “ti kongregasion dagiti Saksi ni Jehova.” Kasla imposible dayta iti maysa a pagilian a mangiparparit iti trabaho dagiti Saksi a panangisuro iti Biblia.
Minilion a tattao iti intero a lubong ti manamnama a tumabuno kadagiti ginasut a “Managtungpal iti Sao ti Dios” a Kombension Distrito dagiti Saksi ni Jehova bayat ti 2000/2001. No tumabunoka, mabalin a makitam a mismo no kasano a dagidiay sipapasnek a mangan-annurot iti kuna ti Biblia itungpalda dagiti nasayaat nga aramid a pakaidayawan ti Dios.