Masirsirmataanen ti Narelihiosuan a Panagkaykaysa?

Masirsirmataanen ti Narelihiosuan a Panagkaykaysa?

“Maim-imatangantayo ti naisangsangayan nga aldaw iti pakasaritaan dagiti simbaantayo,” kinuna ni Christian Krause, presidente ti Lutheran World Federation. Umasping iti dayta, dinakamat ni Pope John Paul II ti “muhon ti narigat a dalan iti pannakaibangon manen ti naan-anay a panagkaykaysa dagiti Kristiano.”

Nayebkas dagitoy a makapagagar a balikas gapu iti pannakapatalged ti Official Common Statement idi Oktubre 31, 1999, idiay Augsburg, Germany, a nangpasingked iti Joint Declaration on the Doctrine of Justification. Maitutop unay ti aldaw ken lugar a nakaangayan dayta nga okasion. Naikuna nga idi Oktubre 31, 1517, inlansa ni Martin Luther dagiti 95 a thesis-na iti ridaw ti simbaan ti kastilio idiay Wittenberg, a nangiruangan iti Protestante a Repormasion. Siempre, idiay Augsburg ti nangidatagan dagiti Luterano idi 1530 iti kangrunaan a prinsipioda, ti Augsburg Confession, a linaksid ti Iglesia Katolika, a nangituggod iti di marisut a susik iti nagbaetan ti Protestantismo ken Katolisismo.

Agbalinto kadi ti Joint Declaration a napateg nga addang iti pannakarisut ti pannakabingay ti iglesia, kas ibagbagada? Saan nga amin a partido ket mangnamnama. Nasurok a 250 a Protestante a teologo ti nangpirma iti maisupadi a petision, a namallaagda maipapan iti panangsakup kadakuada ti Iglesia Katolika. Narurod pay dagiti Protestante idi indeklara ti Iglesia Katolika ti maysa a naisangsangayan nga indulhensia para iti tawen 2000, ti mismo nga aramid a nangituggod iti susik agarup 500 a tawenen ti napalabas. Ket yantangay agpada a maan-anurot pay laeng ti Augsburg Confession ken ti argumento dagiti Katoliko babaen ti Konsilio ti Trent, adayo a maipatungpal ti panagkaykaysa.

Ti pannakapatalged ti aniaman a nagtipon a deklarasion dina marisut ti nakaro a pannakabingay ken susik iti Kakristianuan. Maysa pay, ti panagkaykaysa iti pammati agpannuray kadagiti sursuro a sititibker a naibatay iti Biblia a Sao ti Dios. (Efeso 4:3-6) Imbes a maipatungpal babaen ti pannakikompromiso, agtaud ti pudno a panagkaykaysa iti panagsursuro ken panangaramid iti iparebbeng ti Dios kadatayo. “Amin dagiti il-ili magnada tunggal maysa iti nagan ti diosna,” kinuna ni matalek a propeta Mikias, “ket magnatayto iti nagan ni Jehova a Diostayo iti agnanayon nga awan inggana.”—Mikias 4:5.

[Picture Credit Line iti panid 32]