Panangparmek iti Kinapanglaw​—Awan Kadin ti Namnamana?

NO PASIARENYO ti Naciones Unidas idiay New York City, makitayo sadiay ti Economic and Social Council Chamber, agraman dagiti nakaparang a tubo iti bobida ti publiko a pagbuyaan. Kuna ti tour guide: “Ti ‘di nalpas’ a bobida ket gagangay a mamatmatan kas simboliko a pammalagip a di agsardeng nga agtrabaho ti Naciones Unidas para iti ekonomia ken iti tattao; adda a kanayon ti mabalin nga aramiden tapno maparang-ay ti panagbiag dagiti tattao ditoy lubong.”

Nupay desidido ti Council a pagbalinen a nasalsaliwanwan ti panagbiag ti amin a tao, kasla dina mairingpas dayta. Makapainteres ta bayat ti ministerio ni Jesus ditoy daga idi umuna a siglo K.P., kinunana: “Ti espiritu ni Jehova adda kaniak, agsipud ta pinulotannak a mangideklara ti naimbag a damag kadagiti napanglaw.” (Lucas 4:18) Ania ti “naimbag a damag” nga indeklarana? Dayta ti mensahe maipapan iti Pagarian nga impasdek ni Jehova a Dios, ti “sarikedked ti napanglaw... iti pakarigatanna.” Ni Jesu-Kristo ti insaadna nga Ari iti dayta a turay. Ania ti ibanagna dayta a Pagarian? Impakpakauna ni Isaias: “Ni Jehova dagiti buybuyot agaramidto kadagiti amin nga inilin-ili iti maysa a rambak dagiti nalukmeg a banag, maysa a rambak dagiti ar-arak iti rabaw dagiti aributed, dagiti nalukmeg a banag a napno iti pata, dagiti arak a nadalusan a naimbag kadagiti aributed. Isu inalimonna nga agnanayon ni patay; ket ni Jehova nga Apo punasennanto dagiti lulua kadagiti isuamin a ruprupa.”​—Isaias 25:4-6, 8.

Kayatyo kadi a maammuan ti ad-adu pay a banag no kasano a ‘parang-ayen [ti Pagarian ti Dios] ti panagbiag dagiti tattao ditoy lubong,’ tapno awanton ti napanglaw? Kitaenyo iti baba no kasanokayo nga agpayadal iti maysa a kualipikado a mannursuro a mangilawlawag kadagiti kanayonan nga impormasion ti Biblia maipapan iti dayta a banag.