Operasion a Di Agusar iti Dara—“Maysa a Kangrunaanen a Metodo iti Medisina”
ITI sidong ti paulo nga “Operasion a ‘Di agusar iti Dara,’” impadamag ti magasin a Maclean’s nga “agsirsirarak [dagiti doktor iti intero a Canada] kadagiti baro a metodo a namagbalin iti maaw-awagan nga operasion a di agusar iti dara kas maysa a kangrunaanen a metodo iti medisina kadagiti naglabas a lima a tawen.” Maysa kadakuada ni Brian Muirhead, maysa nga anestesiologo idiay Winnipeg’s Health Sciences Centre. Apay nga agbirbirok iti alternatibo a pamay-an ti panagopera a di agusar iti dara?
Idi 1986, inkarigatan ni Dr. Muirhead nga inopera ti maysa a 70 ti tawenna a lakay a nagpadara gapu iti ulcer. Kiniddaw ti lakay ti kita ti operasion a saan nga agkalikagum iti dara gapu iti naibatay-Biblia a pammatina kas maysa kadagiti Saksi ni Jehova. (Aramid 15:28, 29) Sigun iti Maclean’s, “inusar [ni Dr. Muirhead] ti manmano a maus-usar a metodo a panangibomba iti saline solution iti pasiente tapno agtalinaed a nangato ti presion ti darana.” “Nagballigi ti operasion, ket dayta ti nangpapigsa iti pammati ni Muirhead nga ‘adu unayen ti iyal-alisontayo a dara. Panagkunak ket panawenen tapno padasentayo dagiti sabali a metodo.’”
Ti panagregget nga agsapul iti metodo ti operasion a di agusar iti dara ket “rinubroban agpadpada ti pannakaseknan iti suplay ti dara iti masanguanan—ken ti panagamak dagiti adu a pasiente a makaalada iti virus a pagtaudan ti sakit babaen ti panangyalison iti dara.” Gapu iti nasirarak dagiti masirib a doktor, saan laeng a dagiti Saksi ni Jehova ti nagunggonaan no di pay ket ti adu a sabsabali. “Malaksid a saanton nga agpannuray ti adu nga operasion iti panangyalison iti dara, ti operasion a di agusar iti dara kissayanna ti peggad—kasano man kabassit—ti impeksion manipud kontaminado a dara,” kuna ti Maclean’s. Ngem mabalin a makaimpeksion uray ti “di kontaminado” a dara babaen ti temporario a panangpakapuyna iti immune system dagiti pasiente.
Ania ti makagapu a natibker ti takder dagiti Saksi ni Jehova maipapan kadagiti alternatibo a pamay-an ti panagopera a di agusar iti dara? Nalabit interesado kayo a mangbasa iti broshur a Kasano nga Ispalen ti Dara ti Biagyo? Maragsakan dagiti Saksi ni Jehova a mangiranud iti dayta kadakayo.