“Nakasaysayaat Kaniak ni Jehova!”

ITI maysa a makaay-ayo a rabii idi Marso 1985, adda naisangsangayan a pasamak a naimatangan dagiti lallaki ken babbai iti Writing Department ti hedkuarter dagiti Saksi ni Jehova idiay New York, E.U.A. Innem a pulo a tawen idin ni Karl F. Klein iti amin-tiempo a ministerio. Sireregta a kinuna ni Kabsat Klein: “Nakasaysayaat kaniak ni Jehova!” Imbagana a ti Salmo 37:4 ket paboritona a teksto ti Biblia. Madamdama bassit, pinaragsakna ti amin babaen ti panagtokarna iti cello.

Iti simmaganad a 15 a tawen, nagtultuloy ni Kabsat Klein iti trabahona kas kameng ti writing staff ken iti panagserbi iti Bagi a Manarawidwid dagiti Saksi ni Jehova. Ket idi Enero 3, 2001, iti edad a 95, simamatalek a naturposen ni Karl Klein ti panagbiagna ditoy daga.

Idiay Alemania ti nakayanakan ni Karl. Immakar ti pamiliana idiay Estados Unidos, ket dimmakkel ni Karl iti kaparanget ti Chicago, Illinois. Ubbing pay da Karl ken ti adingna a ni Ted idi naginteresda unay iti Biblia. Nabautisaran ni Karl idi 1918, ket dagiti makapagagar a banag a nangngegna iti maysa a kombension dagiti Estudiante ti Biblia idi 1922 ti nanggutugot kenkuana a maaddaan iti tungpal biag a panagayat iti ministerio iti tay-ak. Dina impalubos a lumabas ti maysa a lawas a di pay nakapangasaba, ket kastat’ inar-aramidna agingga kadagiti maudi a lawas ti biagna.

Nagbalin ni Karl a kameng ti staff ti hedkuarter idi 1925, ket idiay pagimprentaan ti damo a nagtrabahuanna. Napalalo ti panagduyosna iti musika, ket adu a tawen a nagtoktokar iti cello iti maysa nga orkestra kas tampok a programa iti istasion ti radio dagiti Estudiante ti Biblia. Kalpasanna, nagtrabaho iti Service Department, ket nangnangruna a nagragsakanna ti pannakikaduana ken ni T. J. Sullivan, ti manangaywan ti nadakamat a departamento. Kabayatanna, nangasawa ni Ted, ket isu ken ti baketna a ni Doris nagmisioneroda idiay Puerto Rico.

Iti nasurok a 50 a tawen, nagtrabaho ni Karl Klein iti Writing Department, a dita a nakaipaay iti naisangsangayan a kontribusion agsipud ta pagay-ayatna ti agsirarak ken addaan iti nauneg a pannakaawat iti Biblia. Idi 1963, inkallaysa ni Karl ni Margareta, maysa nga Aleman a nagmisionero idiay Bolivia. Babaen ti naayat a pannaranay ni baketna, aglalo idi kumapkapuyen ti salun-atna, nabunga ti trabaho ni Karl uray no nalabsannan ti edad ti panagretiro. Nakallalagip dagiti palawagna kadagiti kongregasion ken kombension ta natural ti kinaprangkana ken nabuyogan iti entusiasmo ti musikero. Di unay nabayag sakbay ti ipapatayna, indauluanna ti diskusion iti teksto iti bigat para iti pamilia ti Bethel ti New York, ket talaga a naragsakan ken nabenepisiaran ti amin.

Malaglagipto ti adu a regular nga agbasbasa iti Pagwanawanan ti pakasaritaan ti biag ni Kabsat Klein, maysa a makaay-ayo a salaysay maipapan kadagiti kapadasanna a naipablaak iti ruar ti Abril 1, 1985 (Oktubre 1, 1984, iti Ingles). Maragsakankay la ketdi a mangbasa wenno maulit-ulit a mangbasa iti dayta a salaysay, a laglagipenyo a ti nagsurat iti dayta ket nakabusbos iti maysa ket kagudua pay a dekada kas matalek ken debotado a Kristiano.

Kas maysa kadagiti pinulotan ti Apo, buyogen ti isuamin a pusona tinarigagayan ni Kabsat Klein ti makipagturay ken Kristo idiay langit. Adda pamatiantayo a tinungpalen ni Jehova dayta a tarigagay.​—Lucas 22:28-30.

[Ladawan iti panid 31]

Ni Karl a kaduana ni T. J. Sullivan agraman kada Ted ken Doris idi 1943

[Ladawan iti panid 31]

Da Karl ken Margareta idi Oktubre 2000