Us-usarenda ti Nagan ti Dios Idiay Central Africa
KAADUAN a tattao idiay Central Africa mamatida iti Dios. Awan panagduaduada nga isu ti Namarsua iti isuamin a bambanag. (Apocalipsis 4:11) Ngem kas iti adu a tattao iti sadinoman, masansan a laksidenda ti personal a naganna a Jehova.
Ti nagan ti Dios ti tuktukoyen dagiti tattao idiay Central Africa ken kasta met kadagiti dadduma pay a paset ti lubong no kunaenda, “Madaydayaw koma ti naganmo” iti Kararag ti Apo. (Mateo 6:9, King James Version) Ngem nabayag a manmano ti makaammo iti dayta a nagan. Nupay kasta, kadagiti naglabas a tawen, ti naregta a panangasaba dagiti Saksi ni Jehova binalbaliwanna ti panangmatmat dagiti tattao iti panangusar iti nagan ti Dios. Ita, adun ti makaammo ken mangawat iti nadibinuan a nagan iti adu a pagsasao ti Africa, kas iti Zulu (uJehova), Yoruba (Jehofah), Xhosa (uYehova) ken Swahili (Yehova). Kaskasdi, ti nagan ti Dios ket saan pay laeng nga us-usaren ti kaaduan a patarus ti Biblia kadagitoy a pagsasao.
Ti nasayaat a patarus a mangus-usar iti nadibinuan a nagan ket ti Biblia iti pagsasao a Zande, a maar-aramat kadagiti paset ti Central African Republic, Sudan, ken ti Democratic Republic of Congo. Iti dayta a paset ti lubong, us-usaren dagiti tattao ti nagan ti Dios, iti ispeling a Yekova iti pagsasaoda sadiay. Kasano man ti pannakaiparang ti nadibinuan a nagan iti lokal a pagsasao, napateg a mausar dayta. Apay? Agsipud ta “tunggal maysa nga umawag iti nagan ni Jehova maisalakanto.”—Roma 10:13.
[Mapa/Ladawan iti panid 32]
(Para iti aktual a pannakaurnosna, kitaem ti publikasion)
SUDAN
CENTRAL AFRICAN REPUBLIC
DEMOCRATIC REPUBLIC OF CONGO
[Credit Line]
The Complete Encyclopedia of Illustration/J. G. Heck