“Naammuak ti Problemak Kamaudiananna!”

KASTA ti panagrikna ti maysa a lalaki idiay Tokyo idi nabasana ti pakasaritaan ti biag iti Disiembre 1, 2000, a ruar Ti Pagwanawanan. Napauluan ti artikulo iti “Dikay Ammo No Anianto ti Pagbalinan ti Biagyo Inton Bigat,” a nakaisalaysayan ti kapadasan ti maysa a dati a misionero nga agsagsagaba iti sakit a maawagan manic-depressive psychosis.

Kastoy ti insurat ti lalaki idiay Tokyo kadagiti mangipabpablaak iti daytoy a magasin: “Apagisu unay dagiti nadakamat a sintoma nga adda kaniak. Dayta ti gapuna a napanak iti ospital dagiti addaan sakit iti isip ket naammuak nga addaanak iti manic depression. Nasdaaw ti doktor a nangeksamen kaniak. Kinunana, ‘Dagiti tattao nga addaan iti kastoy a sakit ket manmano a panunotenda a masakitda.’ Natulonganak a nangtakuat iti sakitko sakbay a kumaro.”

Minilion a tattao iti intero lubong ti nagunggonaan iti adu a pamay-an iti panagbasada iti tunggal ruar Ti Pagwanawanan ken ti magasin a kakuyogna, ti Agriingkayo! Natakuatanda a makaisuro ken makapnek dagiti artikulo. Maipabpablaak ita Ti Pagwanawanan iti 141 a pagsasao, ket ti Agriingkayo! iti 86 a pagsasao. Sigurado a maragsakankayo met a regular a mangbasa iti Ti Pagwanawanan ken Agriingkayo!