Dagiti Mangdaddadael iti Kaykayo
IDI panawen ti Biblia, napateg a produkto dagiti kaykayo. Kas pagarigan, idi gimmatang ni Abraham iti disso a pakaitabonan ti patpatgenna nga asawa a ni Sara, karaman dagiti puon ti kayo iti ginatangna a daga.—Genesis 23:15-18.
Uray iti panawentayo, napateg unay dagiti kayo, ket napalalo ti panangikagumaan ti sangalubongan a mangpreserba kadagiti kabakiran. Kuna ti libro nga State of the World 1998: “Nupay adu a tattao kadagiti makin-amianan a pagilian ti maseknan kadagiti tropikal a kabakiran, mabalin a saanda nga ammo a kadagiti amin a kita ti kabakiran, dagiti kabakiran nga addaan iti kalalainganna a klima iti mismo a pagilianda ti kakaruan a madaddadael.” Ania dagiti mamagpeggad iti kinasalibukag dagiti kabakiran kadagiti makin-amianan a pagilian ti Europa ken Amianan nga America? Ipatuldo ti adu a tattao a maigapu dayta iti pannakakalbo dagiti kabakiran, ngem adda dagiti dadduma a puersa a di madmadlaw nga in-inut a mangdaddadael kadagiti kaykayo. Ania dagitoy? Polusion iti angin ken acid rain. Nalaka a mapeste ken agsakit dagiti kaykayo gapu kadagitoy a makadadael nga elemento nga in-inut a mangpakapuy kadagiti kayo.
Adun a dekada a mangpakpakdaar dagiti environmentalist ken dadduma pay a maseknan nga umili a kasapulan a masalakniban ti sistema ti ekolohia ditoy daga. Idi dekada 1980, kastoy ti nakuna dagiti sientista idiay Alemania kalpasan nga inadalda dagiti epekto ti polusion iti angin ken acid rain: ‘No awan ti panagtignay ita, iti agarup tawen 2000, kadagiti daan a retrato ken pelikula laengen a pagsidsiddaawanto dagiti tattao dagiti kabakiran.’ Naimbag ta naanduran pay laeng ti daga ti adu kadagiti naipakpakauna a pannakadadael gapu iti abilidadna nga agpabaro.
Ngem inton agangay, ti Dios ti kangrunaan a mangpreserba iti sistema ti ekolohiatayo. “Sibuganna dagiti bantay manipud kadagiti makinngato a siledna” ken “pagtubuenna dagiti berde a ruot a maipaay kadagiti animal, ken mulmula nga usaren ti sangatauan.” Ken inkarina a ‘dadaelenna dagidiay mangdaddadael iti daga.’ (Salmo 104:13, 14; Apocalipsis 11:18) Anian a nakaay-ayatto no agnanayon a matagiragsak dagiti agnanaed ditoy daga ti maysa a lubong nga awanan iti polusion! —Salmo 37:9-11.