“Agkikitatayto iti Pagarian ti Dios”
“Patgek a gayyem! Rupert, nasentensiaanak a matay ita nga aldaw. Dika lumdaang gapu kaniak. Awatem ti ayatko ken iti tunggal maysa dita balay. Agkikitatayto iti Pagarian ti Dios.”
INSURAT ni Franc Drozg dagita a sasao idi Hunio 8, 1942, sakbay la unay ti panangpaltog kenkuana dagiti soldado a Nazi. Apay a pinapatayda?
Sigun iti rekord ti Museum of National Liberation idiay Maribor, Slovenia, daytoy 38 ti tawenna a mammanday ket nagkedked a tumipon iti Wehrmannschaft, maysa a maisagsagana a puersa militar idiay Slovenia a sinakup idi ti Alemania. Isu ket maysa a Bibelforscher wenno Estudiante ti Biblia, kas pannakaawag idi kadagiti Saksi ni Jehova iti dayta a lugar. Kas panangsurotna iti Isaias 2:4, saanna a sinuportaran ti pannakigubat ti Nazi, nga impakaammona nga isu ket sakup ti Pagarian ti Dios.—Mateo 6:33.
Iti ilina a Ptuj, nalatak ni Franc kas maysa a naregta a manangiwaragawag iti naimbag a damag ti Pagarian Dios. (Mateo 24:14) Iti laksid ti adu a pakarigatan, awan sarday nga inkasabana ti naimbag a damag agingga iti pannakaarestona idi Mayo 1942.
Adu a Saksi ni Jehova a taga Slovenia ti nakaro nga indadanes dagiti Nazi. Ni Franc ti maysa kadakuada nga immuna a napapatay gapu iti narelihiosuan a takderna. Kas kadagiti Kristiano idi umuna a siglo, isu ket napabileg kadagiti sasao a: “Masapul a sumrektayo iti pagarian ti Dios babaen iti adu a rigat.” (Aramid 14:22) Mamati iti kinapudno dayta nailangitan a gobierno kas ipakita ti pammakada a sasaona, “Agkikitatayto iti Pagarian ti Dios.”
[Picture Credit Lines iti panid 32]
Franc Drozg: Photo Archive-Museum of National Liberation Maribor, Slovenia; surat: Naidulin ti orihinal iti Museum of National Liberation idiay Maribor, Slovenia