“Babaen iti Lawagmo Makitami ti Lawag”
MASANSAN a satay la maamiris ti pateg ti lawag no awan ti koriente ken nasipnget ti aglawlaw. Makaparagsak ta naan-anay a mapagtalkan ti “planta ti koriente” iti langit—ti init. Ket agyamantayo ta babaen ti lawag ti init, makakita, makapangan, makaanges, ken makapagbiagtayo.
Yantangay napateg ti lawag iti panagbiag, ditay pakasdaawan no mabasatayo iti Genesis a ti lawag nagparang iti umuna nga aldaw ti panamarsua. “Kinuna ti Dios: ‘Maadda koma ti lawag.’ Iti kasta naadda ti lawag.” (Genesis 1:3) Dagiti managraem a tattao a kas ken Ari David kanayon a binigbigda ni Jehova kas ti gubuayan ti biag ken lawag. “Adda kenka ti ubbog ti biag,” insurat ni David. “Babaen iti lawagmo makitami ti lawag.”—Salmo 36:9.
Agpada nga agaplikar iti literal ken piguratibo ti sasao ni David. Ilawlawag ti Encyclopædia Britannica: “Talaga a ti lawag ti makagapu no apay a makakitatayo.” Innayonna: “Ad-adu nga impormasion ti umuneg iti isip ti tao babaen ti mata ngem iti aniaman a dadduma a sentido.” Yantangay adu kadagiti ad-adalentayo ti agpannuray iti sagut a makakita—nga agkasapulan iti lawag tapno siuumiso a makapagandar—ti lawag ket nausar met iti Kasuratan iti piguratibo a pamay-an.
Gapuna, kinuna ni Jesus kadagiti adalanna: “Siak ti silaw ti lubong. Ti sumurot kaniak saanto a pulos magna iti sipnget, no di ket ikutannanto ti silaw ti biag.” (Juan 8:12) Ti piguratibo a lawag a tinukoy ni Jesus isu ti mensahe ti kinapudno nga inkasabana, a makabael a manglawag kadagiti panunot ken puso dagiti dumdumngeg kenkuana. Kalpasan ti adu a tawen a naespirituan a kinasipnget, natarusan met laeng dagiti adalan ni Jesus ti panggep ti Dios maipaay iti sangatauan ken ti namnama nga iyeg ti Pagarian. Daytoy ket pudno a “silaw ti biag,” yantangay mangiturong dayta a pannakaammo iti biag nga agnanayon. ”Daytoy kaipapananna ti agnanayon a biag,” kinuna ni Jesus idi nagkararag iti nailangitan nga Amana, “ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Ditay koma pulos tagtagilag-anen daytoy naespirituan a lawag!