Nagannak​—Itedyo ti Kasapulan Dagiti Annakyo!

KASAPULAN dagiti annak ti panangiwanwan ken naayat a disiplina, nga ipaay a nangnangruna dagiti nagannak kadakuada. Maipapan iti daytoy a banag, kuna ni Tania Zagury, a maysa nga edukador a taga Brazil: “Tunggal ubing agannayas nga agbirok iti pagragsakan. Nasken nga adda maikeddeng a restriksion. Dagiti nagannak ti mangikeddeng iti daytoy. No dida aramiden ti kasta, saandanton a makontrol dagiti annakda.”

Nupay kasta, iti adu a nasion mabalin a narigat a suroten ti balakad a nadakamat iti ngato gapu iti impluensia ti napanuynoy a kagimongan a mangitandudo iti personal a wayawaya. Ngarud, siasino ti pagpatulongan dagiti nagannak? Bigbigen dagiti managbuteng-Dios a nagannak a ti annakda ket “tawid manipud ken Jehova.” (Salmo 127:3) Ngarud, agpaiwanwanda iti Sao ti Dios, ti Biblia, iti panangpadakkel kadagiti annakda. Kas pagarigan, kuna ti Proverbio 13:24: “Daydiay mangigawid iti pagbautna gurguraenna ti anakna, ngem daydiay mangay-ayat kenkuana isu daydiay kumitkita kenkuana a buyogen ti disiplina.”

Ti panangusar ti Biblia iti sao a “pagbaut” di koma panunoten a ti laeng kaipapananna ket pisikal a panangdusa; irepresentarna ti aniaman a pamay-an ti panangilinteg. Wen, kaaduanna a mabalin a ti panangbagbaga iti ubing ket umdasen a mangkorehir iti di umiso nga aramidna. Kuna ti Proverbio 29:17: “Dusaem ti anakmo ket mangyegto kenka iti inana ken ipaayanna ti kararuam iti adu a ragsak.”

Kasapulan dagiti annak ti naayat a disiplina tapno mailinteg dagiti di matarigagayan a kababalinda. Ti kasta a natibker ken naasi a panangilinteg paneknekanna a maseknan dagiti nagannak iti annakda. (Proverbio 22:6) Ngarud, dikay sumuko a nagannak! Babaen ti panangsurot iti nasimbeng, praktikal a balakad ti Biblia, maparagsakyo ni Jehova a Dios ken raemendakayo dagiti annakyo.