Ni Henry VIII ken ti Biblia
ITI librona a History of the English-Speaking Peoples (Tomo 2), insurat ni Winston Churchill: “Iti narelihiosuan a pammati, nangyeg ti Repormasion iti dakkel a panagbalbaliw. Naaddaan ita ti Biblia iti baro ken nabileg nga impluensia. Impapan dagiti nagkauna a tattao a ti Nasantuan a Sursurat ket napeggad iti ima dagiti awan adalna ken rumbeng a dagiti laeng padi ti mangbasa.”
Ituloy ti salaysay: “Dagiti kompleto a nayimprenta a Biblia, nga impatarus da Tyndal ken Coverdale iti Ingles, ket nagparang iti kaunaan a gundaway iti naud-udi a paset ti otonio ti 1535, ken mayim-imprenta idin iti sumagmamano nga edision. Indagadag ti Gobierno kadagiti klero nga iparegtada ti panagbasa iti Biblia.” Kalpasan ti sinigsiglo a kinaignorante iti Biblia, naammuan ti Inglatera ti linaon ti Biblia, ngem gapu iti gobierno ni Henry VIII imbes a ti simbaan.a
“Kas maysa pay a nakaibabainan dagiti tattao a nangannurot kadagiti sigud nga aramid ken kapanunotan maipapan iti Biblia, inautorisaran ti Gobierno ti pannakayimprenta idiay Paris ti adu nga Ingles a Biblia, a nagasgastos ngem iti aniaman a naglabas nga edision. Idi Setiembre 1538, imbilin ti Gobierno a tunggal parokia iti pagilian ket masapul a gumatang iti kadakkelan a tomo ti Ingles a Biblia, sa maikabil iti simbaan, tapno nalaka a mausar ken mabasa dagiti makimisa. Innem a kopia ti naikabil idiay St Paul, iti Siudad ti London, ket nagadu ti nagturong iti katedral iti agmalem tapno basaenda dagita, nangruna, naibaga kadakami, no adda ti maayabanda a tao a mangibasa iti dayta iti napigsa.”
Makapaladingit, iti adu a pagilian, adu ti saan a mangaprobetsar iti pribilehioda a mangbasa a regular iti Biblia. Dakkel a pakaseknan daytoy, yantangay ti laeng Biblia ti “impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.”—2 Timoteo 3:16.
[Footnote]
a Inturayan ni Ari Henry VIII ti Inglatera idi 1509 agingga 1547.
[Picture Credit Line iti panid 32]
Ni Henry VIII: Ladawan nga adda iti Royal Gallery idiay Kensington, manipud iti libro a The History of Protestantism (Tomo I)