Dagiti Naimbag nga Aramid Itan-okda ti Dios

BABAEN dagiti naimbag a kababalin ken mapagulidanan nga aramid, mangipaay dagiti pudno a Kristiano iti pakaitan-okan ti Dios. (1 Pedro 2:12) Nayanninaw daytoy iti napasamak idiay Italia kadagiti napalabas a tawen.

Idi Setiembre 1997, maysa a napigsa a ginggined ti nangdayyeg iti nadumaduma a rehion ti Marche ken Umbria, a nakadadaelan ti agarup 90,000 a pagtaengan. Addada grupo dagiti Saksi ni Jehova a dagus a timmulong kadagiti kapammatianda ken iti sabsabali. Naipaay dagiti trailer, sleeping bag, dalikan, generator, ken dadduma pay a kasapulan a banag. Nadlaw dagitoy a panangikagumaan a tumulong.

Impadamag ti pagiwarnak nga Il Centro: “Ti immuna a simmangbay nga addaan kadagiti pangsaranay nga abasto kadagiti naapektaran a lugar ket dagiti Saksi ni Jehova manipud Roseto [iti probinsia ti Teramo] . . . Malaksid iti regular a panagtataripnongda tapno agkararag, dagiti matalek ken ni Jehova agtrabahoda iti praktikal a pamay-an, nga idiayada ti tulongda kadagiti agsagsagaba, aniaman ti relihion dagitoy.”

Nagsurat kadagiti Saksi ti mayor ti Nocera Umbra, maysa kadagiti ili a kakaruan a naapektaran. Kunana: “Naimpusuan ken personal nga agyamanak kadakayo gapu iti tulong nga impaayyo kadagiti umili ti Nocera. Siguradoak nga inyebkasko ti sentimiento ti amin nga umilina.” Kanayonanna, impaayan ti Ministry of the Interior ti Congregazione Cristiana dei Testimoni di Geova (Kongregasion Kristiano Dagiti Saksi ni Jehova) iti sertipiko ti pammadayaw ken maysa a medalia a “mangpaneknek iti naaramid a trabaho ken ti naipakita a regget iti pannakipaset kadagiti trabaho a mainaig iti emerhensia a napagteng kadagiti rehion ti Umbria ken Marche.”

Idi Oktubre 2000, maysa a layus ti nangdidigra iti rehion ti Piedmont iti makin-amianan nga Italia. Manen, dagus a nagtignay dagiti Saksi tapno sumaranay. Nadlaw met dagitoy a naimbag nga aramid. Impaayan ida ti Piedmont Region iti plake gapu iti “nagpateg a boluntario a panagtrabahoda kas panangsuporta kadagiti taga Piedmont a naapektaran iti layus.”

Imbilin ni Jesu-Kristo kadagiti adalanna: “Agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.” (Mateo 5:16) Pakaragsakan dagiti Saksi ni Jehova nga itan-ok ti Dios, saan a ti bagbagida, babaen dagiti ‘nasayaat nga aramid’ a tumulong kadagiti kaarrubada iti naespirituan ken kadagiti dadduma pay a pamay-an.