No Kasano a ti Maysa nga Anak Tinulonganna ni Tatangna
IDI agtawen iti 32 ni James a taga Inglatera, adda nakaro a sakitna iti panunot ken medio autistiko. Nupay kasta, adu a tawen a tumabtabuno kadagiti gimong dagiti Saksi ni Jehova a kaduana da nanang ken manangna. Ngem pulos a saan a naginteres ni tatangna iti pammatida. Iti maysa a rabii, kalpasan ti gimong a nakaiparangan ti demostrasion no kasano nga awisen dagiti gagayyem a dumar-ay iti Panglaglagip iti ipapatay ni Kristo, dagus a napan ni James iti siledna. Sidadanag a sinurot ni nanangna ket nakitana a di makaidna nga agsuksukain kadagiti daan a kopia ti magasin a Pagwanawanan ken Agriingkayo! Nangpili iti magasin nga iti makinlikud a panidna adda retrato ti imbitasion iti Memorial, ket nagdardaras a nagturong ken tatangna. Intudona nga umuna ti ladawan, sa ni tatangna ket kinunana “Sika!” Nasdaawan a nagkinnita da nanang ken tatangna a natarusanda nga aw-awisen ni James ti amana a dumar-ay iti Memorial. Kinuna ni tatangna a nalabit a tumabuno.
Iti rabii ti Memorial, napan ni James iti aparador ni tatangna, nagpili iti kawes, impanna ken tatangna, sana insenias nga ikawesna koma dayta. Insungbat ti ama a saan a makigimong. Gapuna, ni laeng James ken ni nanangna ti napan iti Kingdom Hall.
Ngem naminsan, kimmaro ti panagkedked ni James idi parubbuaten ni nanangna a makigimong, a kaykayatna ti agbati iti pagtaengan a kaduana ti amana. Kalpasanna, iti maysa nga agsapa ti Domingo, marigatan manen ti ina ni James a mangparubbuat kenkuana a makigimong. Naklaat ti inana idi kinasao ni tatangna, “James, no makigimongak ita, makigimongka met kadi?” Rimmaniag ti rupa ni James. Inarakupna ti amana ket kinunana “Wen!” ket napanda a tallo iti Kingdom Hall.
Manipud iti dayta nga aldaw, intultuloy a tinabunuan ti ama ni James dagiti amin a gimong iti Domingo ket di nagbayag kinunana a tapno rumang-ay, nasken a tabunuanna ti dadduma pay a gimong. (Hebreo 10:24, 25) Inaramidna dayta, ket dua a bulan kalpasanna, regular a nagadal iti Biblia. Napartak ti irarang-ayna, dagus a binalbaliwanna ti panagbiagna, ket di nagbayag inrugina ti nakipaset iti trabaho a panangikasaba iti Pagarian. Maysa a tawen kalpasan a nakipagadal iti Biblia, indedikarna ti biagna ken ni Jehova ket insimbolona dayta babaen ti pannakaitaneb. Madama ita nga agserserbi kas ministerial nga adipen iti kongregasion. Ti intero a pamilia ket sangsangkamaysa ita nga agserserbi ken ni Jehova.