Dikayo Paallilaw
ADDAN ti panangallilaw sipud pay idi rugrugi ti pakasaritaan ti tao. Panangallilaw ti maysa kadagiti damo a pasamak a nairekord iti historia. Isu dayta ti panangallilaw ni Satanas ken ni Eva iti minuyongan ti Eden.—Genesis 3:13; 1 Timoteo 2:14.
Kanayon nga agraraira ti panangallilaw ditoy daga sipud idi, ngem nakarkaro ita. Iti panangipakpakaunana iti kasasaad iti moderno a panawen, imballaag ti Biblia: “Dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay, a mangyaw-awan ken mayaw-awanda.”—2 Timoteo 3:13.
Maal-allilaw dagiti tattao iti nagduduma a rason. Mangbiktima dagiti suitik ken estapador tapno makagun-odda iti kuarta. Dadduma a politiko allilawenda dagiti umilida, a determinadoda nga agtalinaed iti posisionda iti aniaman a pamay-an. Dagiti tattao allilawenda a mismo ti bagbagida. Imbes a sanguenda ti kinapudno, ipapatida nga awan ti pagdaksanna uray itultuloyda dagiti napeggad nga aramid, kas iti panagsigarilio, panagdroga, wenno seksual nga imoralidad.
Adda met dagiti panangallilaw mainaig iti narelihiosuan a bambanag. Dagiti papanguluen ti relihion idi kaaldawan ni Jesus inallilawda dagiti tattao. Kinuna ni Jesus kadagidi a manangallilaw: “Isuda dagiti bulsek a mangidaldalan. No, ngarud, ti bulsek a tao idalanna ti bulsek a tao, matnagdanto nga agpada iti abut.” (Mateo 15:14) Maysa pay, allilawen ti tattao ti bagbagida mainaig iti narelihiosuan a bambanag. Kuna ti Proverbio 14:12: “Adda dalan a nalinteg iti sanguanan ti maysa a tao, ngem dagiti dalan ni patay isuda ti tungpal dayta kalpasanna.”
Kas idi panawen ni Jesus, adu ita dagiti naallilaw mainaig iti narelihiosuan a bambanag, ket di pagsiddaawan dayta! Kinuna ni apostol Pablo a ni Satanas “binulsekna ti pampanunot dagiti di manamati, tapno ti lawag ti nadayag a naimbag a damag maipapan iti Kristo, a ladawan ti Dios, saan koma nga agsilnag.”—2 Corinto 4:4.
No maallilawnatayo ti maysa nga estapador, mapukawantayo iti kuarta. No maallilawnatayo ti maysa a politiko, mabalin a mapukawantayo iti sumagmamano a wayawaya kas resultana. Ngem no maallilawnatayo ni Satanas tapno laksidentayo ti kinapudno maipapan ken Jesu-Kristo, mapukawtayo ti biag nga agnanayon! Isu a dikayo paallilaw. Situtulok nga usigenyo ti di mapagduaduaan a gubuayan ti narelihiosuan a kinapudno, ti Biblia. Maikapistayo iti dakkel a gunggona no ditay aramiden dayta.—Juan 17:3.