Kasapulantayo Amin ti Komendasion

NASAYAAT ti aldaw ti balasitang. Nupay kasapulan a makorehir no dadduma, iti dayta a partikular nga aldaw, naidumduma ti kinasingpetna. Ngem iti karabiyanna, kalpasan a naipaidda iti katre, agsangsangit ket nangngeg ni nanangna. Idi mayimtuod kenkuana no apay, aglulua nga insaibbekna: “Saanak kadi a nasingpet ita nga aldaw?”

Kasta unay ti pannakasidir ti ina gapu iti dayta a saludsod. Kanayon nga alisto a mangkorehir iti anakna. Ngem ita, nupay nakitana ti panangikagumaan ti balasitangna nga agbalin a nasingpet, dina man la inapresiar.

Saan laeng a dagiti babassit nga ubbing ti agkasapulan iti komendasion ken pammatalged. Kasapulantayo amin​—no kasano a kasapulantay ti balakad ken panangilinteg.

Ania ti riknatayo no naimpusuan a komendarandatayo? Saan kadi a maragsakan ken lumag-an ti riknatayo? Nalabit mariknatayo a no adda nakadlaw, adda maseknan. Mangipaay dayta iti pammatalged a saan a sayang ti inaramidtayo, ken gutugotennatayo nga agtignayto manen a siaanep. Di pagsiddaawan a ti napasnek a komendasion masansan a pasingedennatayo iti tao a nangiwaya iti tiempo tapno mangparegta.​—Proverbio 15:23.

Ammo ni Jesu-Kristo a nasken ti mangkomendar. Iti pangngarig maipapan kadagiti talento, ti apo (a mangiladawan ken Jesus a mismo) sibabara a kinomendaranna ti tunggal maysa kadagiti dua a matalek nga adipen, a kunkunana: “Nasayaat unay, naimbag ken matalek nga adipen!” Anian a makapabileg! Uray nagduma unay dagiti abilidad ken gapuananda, nakaawatda iti agpada a komendasion.​—Mateo 25:19-23.

Ngarud, laglagipentayo ti ina dayta a balasitang. Saantayo koma nga urayen nga adda aglua sakbay a mangkomendartayo. Imbes ketdi, siguraduentayo koma ti agsapul kadagiti gundaway a mangkomendar. Wen, umiso unay a mangipaaytayo iti napasnek a komendasion iti kada gundaway.