“Hustoka, Makaparagsak ti Biag!”

KAYATYO kadi a maammuan ti pudno a panggep ti biag? Dayta ti naammuan ni Katarzyna babaen ti tulong ti kaklasena iti haiskul a ni Magdalena, agtawen iti 18, maysa kadagiti Saksi ni Jehova ken agnanaed idiay Szczecin, Poland. Inaklon ni Katarzyna nga isu ket maysa nga ateista, ngem nangipakita iti napasnek a panaginteres idi nakisarita kenkuana ni Magdalena maipapan iti Biblia.

Nupay nagustuan ni Katarzyna ti naibatay-Biblia nga imbaga ni Magdalena, saanna a naan-anay nga inawat dayta. Bayat a nakisarita ken ni Magdalena maipapan iti pudno a gagayyem, kinuna naminsan ni Katarzyna: “Adda Bibliam; ammom no ania dagiti surotem a prinsipio ken no pakasarakam iti gagayyem. Ngem kasano ngay dagiti tattao a di pay mangawat kadagita a prinsipio?”

Nagbaliw ti panangmatmat ni Katarzyna idi napan idiay Londres, Inglatera. Binisitana ti sanga nga opisina dagiti Saksi ni Jehova sadiay, ket natignay gapu iti nasayaat a pannakatratona. Naay-ayo kadagiti simple nga aramid a kas iti pananglukat iti ridaw para kenkuana ken panangipakita iti napudno nga interes iti ibagbagana.

Idi nangrugi manen ti klase idi Setiembre 2001, inkeddeng ni Katarzyna a regular a makipagadal iti Biblia. Parparayrayenna ti panangipategna kadagiti prinsipio ti Biblia ken inrugina nga iyaplikar dagitoy iti inaldaw a panagbiagna. Di pay nabayag, impudnona ken ni Magdalena: “Kasla mangrugrugiak iti baro a biag.” Nangipatulod pay kenkuana iti ababa a mensahe babaen ti cellular phone: “Agyamanak unay iti panagadalta ita nga aldaw! Hustoka, makaparagsak ti biag! Nagsayaat a maammuan no siasino ti rumbeng a pagyamanan gapu iti dayta.”