Nalagip Dagiti Napapatay a Saksi ni Jehova
IDI Marso 7, 2002, naipabuya ti maysa a panglaglagip a plake iti ili ti Körmend iti makinlaud a Hungary. Panglaglagip dayta iti ipapatay ti tallo kadagiti Saksi ni Jehova a pinapatay dagiti Nazi idi 1945.
Nakaplastar ti plake iti pader ti agdama a hedkuarter ti departamento dagiti bombero idiay Hunyadi Road, a nakapasamakan ti publiko a panangpapatay. Naidedikar ti plake kas panglaglagip ‘kadagiti Kristiano a napapatay idi Marso 1945, gapu iti panagkedkedda sigun iti konsiensiada. Antal Hönisch (1911-1945), Bertalan Szabó (1921-1945), János Zsondor (1923-1945), 2002, dagiti Saksi ni Jehova.’
Napasamak dayta a panangpapatay dua laengen a bulan sakbay ti panagpatingga ti Gubat Sangalubongan II. Apay a napapatay dagitoy a Kristiano? Kuna ti periodiko ti Hungary a Vas Népe: “Idi a ni Hitler ti nagturay idiay Alemania, saan laeng a dagiti Judio no di ket uray dagiti matalek a Saksi ni Jehova ti nagbalin a puntiria ti panangidadanes ken panangparigat, kampo konsentrasion ken ipapatay no dida tallikudan ti relihion a patpatienda. . . . Idi Marso 1945, nakaal-alinggaget ti napasamak iti makinlaud a paset ti Hungary. . . . Karaman iti dayta ti panangideporta ken panangpapatay kadagiti miembro dagiti Saksi ni Jehova.”
Ti programa mainaig iti plake ket nabingay iti dua a paset. Naangay ti umuna a paset iti teatro ti Batthyányi Castle. Karaman kadagiti ispiker da Propesor Szabolcs Szita, ti mangidadaulo ti Holocaust Documentation Center idiay Budapest; László Donáth, kameng ti Parliament’s Committee for Human Rights, Minority and Religious Affairs; ken Kálmán Komjáthy, maysa a nakasaksi iti daydi a panangpapatay ken isu ita ti historiador ti ili. Ti nasurok a 500 a presente pinasiarda ti ili para iti maikadua a paset ti programa—ti pannakaipabuya ti plake babaen ken Mayor József Honfi iti Körmend.
Iti pammakada a suratna, ni Ján Žondor (János Zsondor) indagadagna kadagiti kakabsatna a Kristiano a dida agleddaang. Insuratna: “Malaglagipko pay laeng ti sasao ni Juan a masarakan iti Apocalipsis 2:10: ‘Paneknekam ta bagim a matalek uray agingga ken patay.’ . . . Ibagayo kadagiti nasinged kaniak a dida agleddaang, ta matayak gapu iti kinapudno, saan ket a kas kriminal.”
[Ladawan iti panid 32]
Bertalan Szabó
[Ladawan iti panid 32]
Antal Hőnisch
[Ladawan iti panid 32]
Ján Žondor