Kinapasnek—Napateg, Ngem Umdas Kadi?
TALAGA kadi a napateg ti kinapasnek iti inaldaw a panagbiagtayo? Iti maysa a diksionario, nadepinar ti “kinapasnek” kas “di panaginkukuna wenno di panaginsisingpet; kinamapagpiaran; kinaprangka; kinapudno.” Nalawag, makatulong daytoy a galad a mangparayray iti nasayaat a relasion kadagiti sabsabali. Imbalakad ni apostol Pablo: “Agtulnogkayo iti amin a banag kadagidiay appoyo iti nainlasagan a kaipapanan, saan a buyogen ti ar-aramid a panagserbi iti mata, a kas manangay-ayo iti tattao, no di ket buyogen ti kinapasnek ti puso, buyogen ti panagbuteng ken Jehova.” (Colosas 3:22) Siasino ti amo a saan a maragsakan a maaddaan iti kasta a napasnek a trabahador? Kadagitoy a tiempo, mabalin a maaddaan dagiti napasnek a tattao iti dakdakkel a gundaway a makasapul ken di maawanan iti trabaho.
Nupay kasta, ti mamagbalin iti kinapasnek a nakapatpateg ket no kasano nga apektaranna ti relasiontayo iti Dios. Tinagiragsak dagiti nagkauna nga Israelita ti pamendision ti Dios idi siaannad a sinalimetmetanda dagiti linteg ken dagiti piesta. Idi dakdakamatenna ti kinadalus ti kongregasion, indagadag ni Pablo kadagiti Kristiano: “Ngilinentayo ti piesta, saan a buyogen ti daan a lebadura, wenno buyogen ti lebadura ti kinadakes ken kinakillo, no di ket buyogen dagiti di pinaalsa a tinapay ti kinapasnek ken kinapudno.” (1 Corinto 5:8) Tapno anamongan ti Dios ti panagdayawtayo, ti kinapasnek ket saan laeng a napateg no di ket nasken met. Ngem imutektekanyo a saan nga umdas ti kinapasnek laeng. Masapul a mabuyogan dayta iti kinapudno.
Mabalin a dagiti nangaramid ken pasahero ti Titanic sipapasnek a patienda a di lumned dayta a nagdakkelan a barko. Ngem iti damo a biahena idi 1912, nakadungpar iti iceberg ket 1,517 ti natay. Adda dagiti Judio idi umuna a siglo a mabalin a sipapasnek a namati iti wagas ti panagdayawda iti Dios, ngem ti regtada ket “saan a maitunos iti umiso a pannakaammo.” (Roma 10:2) Tapno makaay-ayotayo iti Dios, masapul a naibatay iti umiso nga impormasion dagiti banag a sipapasnek a patpatientayo. Maragsakan dagiti Saksi ni Jehova iti lugaryo a tumulong kadakayo a mangammo iti ramanen ti panagserbi iti Dios buyogen ti kinapasnek ken kinapudno.