“Nasarakak ti Amin a Kasapulak”

NAPATTAPATTA itay nabiit a nasurok a 120 a milion a tattao iti sangalubongan ti agsagsagaba iti panagleddaang, sigun iti report ti World Health Organization. Kada tawen, maysa a milion ti agpakpakamatay ken 10 agingga 20 a milion ti mangpadpadas a mangkettel iti biagda. Ania ti makatulong kadagiti agledleddaang? Ti medikal a pannakataming mabalin a maep-epna ti panagsagaba, ken napateg ti emosional a suporta. Kanayonanna, dadduma nga agsagsagaba iti kasta nakasapulda iti kanayonan a tulong kadagiti praktikal a naibatay-Biblia a publikasion dagiti Saksi ni Jehova, kas ipakita ti sumaganad a surat manipud Francia.

“Iti di pay nabayag, nariknak nga awanen serbi ti biagko. Inkararagko iti Dios a matayak la koman. Kasla natayakon iti panagriknak. Sipapasnek nga inkararagko ti panangiwanwan ni Jehova. Inkeddengko met a basaen ti 2002 Tinawen a Libro Dagiti Saksi ni Jehova ket nalpasko dayta iti tallo nga aldaw. Maibagak a kasta unay ti pannakaparegtak ken pannakapabileg ti pammatik.

“Sinukimatko dagiti magasin a Pagwanawanan ken Agriingkayo!, ket anian ti pannakasorpresak! Nasurok a 15 a tawen a regular nga agbasbasaak kadagitoy a magasin, ngem diak pulos nabigbig a makaparegta ken makagutugot unay dagiti artikulo. Napnoda iti ayat​—galad a manmano a maiparangarang ita. Nasarakak ti amin a kasapulak.”

Kuna ti Biblia: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” (Salmo 34:18) Awan duadua, amin dagiti “nadunor ti pusoda” wenno ‘naidagel ti espirituda’ mabalin a masarakanda iti Biblia ti pammaregta ken namnama iti masanguanan. Dagiti Saksi ni Jehova mangiwarwarasda iti naibatay-Biblia a literatura a tumulong kadagidiay agkasapulan tapno magunggonaanda iti gubuayan ti liwliwa nga impaltiing ti Dios.