“Salimetmetanyo ti Naimbag a Konsiensia”
MASANSAN a mangngeg ti balakad a “surotem no ania ti ibaga ta konsiensiam.” Ngem tapno mapagpiaran ti ibaga ti konsiensiatayo, kasapulan a siuumiso a masuruan no ania ti naimbag ken dakes, ken masapul a mabigbigtayo ti panangidalanna.
Usigenyo ti kapadasan ti maysa a lalaki nga agnagan iti Zaqueo, kas nairekord iti Biblia. Ni Zaqueo, nga agnanaed idiay Jerico, ket maysa a panguluen dagiti agsingsingir iti buis ken nabaknang a tao. Inaminna a bimmaknang babaen ti panagkikil—maysa nga aramid a sigurado a mangimameg kadagiti sabsabali. Nasidir kadi ti konsiensia ni Zaqueo gapu iti dakes nga ar-aramidna? No wen, nalawag a saanna nga inkankano dayta.—Lucas 19:1-7.
Ngem adda pasamak a nangtignay ken ni Zaqueo tapno utobenna ti aramidna. Napan ni Jesus idiay Jerico. Kayat ni Zaqueo a makita ni Jesus. Ngem gapu ta pandek, saanna a makita ni Jesus gapu ta inaribungbongan dagiti tattao. Gapuna, timmaray nga immun-una ket kimmalay-at iti kayo tapno matannawaganna. Gapu ta nagustuanna ti nasged nga interes ni Zaqueo, kinuna ni Jesus a sarungkaranna iti pagtaenganna. Siraragsak a pinasangbay ni Zaqueo ti natan-ok a bisitana.
Gapu iti nakita ken nangngeg ni Zaqueo bayat ti pannakitimpuyogna ken ni Jesus, nagutugot ken nagtignay a mangbalbaliw kadagiti daldalanna. Impakaammona: “Adtoy! Ti kagudua dagiti sanikuak, Apo, itedko kadagiti napanglaw, ket aniaman a kinikilko iti asinoman babaen iti ulbod a pammabasol isublik iti mamimpat a kaadu.”—Lucas 19:8.
Nasursuruan ti konsiensia ni Zaqueo, ket impangagna dayta. Nagsayaat unay ti resultana. Panunotem no ania ti narikna ni Zaqueo idi kuna kenkuana ni Jesus: “Iti daytoy nga aldaw immay ti pannakaisalakan iti daytoy a balay!”—Lucas 19:9.
Anian a makaparegta a kapadasan! Ipakpakitana a makapagbalbaliwtayo aniaman ti dati a panagbiagtayo. Kas ken ni Zaqueo, mabalintayo nga ipangag ti sasao ni Jesus—a nairekord iti Biblia—ket mapatanortayo ti abilidadtayo a mangilasin iti naimbag ken dakes. Kalpasanna, mabalintayo, kas indagadag ni apostol Pedro, a ‘salimetmetan ti naimbag a konsiensia.’ Mabalintayo a suroten ti nasanay a konsiensiatayo ken aramiden ti naimbag.—1 Pedro 3:16.