No Ania ti Maisuro Kadatayo Dagiti Tumatayab
“PALIIWENYO a sipapasnek dagiti tumatayab iti langit, agsipud ta saanda nga agmula iti bin-i wenno agani wenno agipempen kadagiti kamalig; kaskasdi a ti nailangitan nga Amayo taraonanna ida. Saan kadi a napatpategkayo ngem isuda?” (Mateo 6:26) Sinao dagitoy ni Jesu-Kristo iti nalatak a sermonna iti bantay nga asideg iti Baybay ti Galilea. Saan laeng a dagiti pasurotna ti agdengdengngeg. Adda met idi sadiay ti dakkel a bunggoy a posible nga agbalin nga adalanna manipud iti amin a paset ti pagilian. Adu kadakuada ti napanglaw a nangyeg kadagiti masakit tapno paimbagen ni Jesus.—Mateo 4:23–5:2; Lucas 6:17-20.
Idi mapaimbagna dagiti amin a masakit, impaayan ni Jesus iti atension dagiti napatpateg a naespirituan a kasapulanda. Maysa kadagiti leksion nga insurona isu ti immunan a nadakamat.
Nabayagen nga adda dagiti tumatayab iti langlangit. Dadduma kadagitoy ket mangan iti insekto, adda met dagiti mangan iti prutas ken bukbukel. No nangipaay ti Dios iti kasta a nawadwad a taraon para kadagiti tumatayab, sigurado a matulonganna dagiti tattao nga adipenna a gumun-od iti inaldaw a taraonda. Aramidenna daytoy babaen ti panangtulongna kadakuada nga agsapul iti panggedan tapno makasapulda iti kuarta a paggatang iti taraon. Wenno bendisionanna dagiti immulada a pagtaraonda. No adda emerhensia, kabaelan a tignayen ti Dios ti puspuso dagiti naasi a kaarruba ken gagayyem a mangiranud iti aniaman nga adda kadakuada a taraon agpaay kadagiti agkasapulan.
Adu pay ti masursurotayo babaen ti panangpaliiw a naimbag iti panagbiag dagiti tumatayab. Ti Dios pinarsuana dagiti tumatayab nga addaan iti nakaskasdaaw a kasisigud nga agaramid kadagiti umok a pangpadakkelanda kadagiti sibongda. Kitaenyo ti dua a nagduma a kita ti umok. Nailadawan iti kannigid ti umok ti maysa a rock martin ti Africa. Naaramid dayta iti suli ti bato wenno iti pader ti balay. Ti nakarungarong a bato ti agserbi a pannakaatep dagiti kasta nga umok wenno, kas naipakita iti ladawan, dagiti sagumaymay ti pasdek. Ti pannakadatar ti umok ket naaramid iti babassit a binukel a daga a nakorte a kas kopa. Ti lalaki ken babai a tumatayab agpada a siaanep nga agurnong kadagiti binukel a daga ken agpaut iti nasurok a maysa a bulan nga aramidenda ti umokda. Kalpasanna, ap-apanda dayta kadagiti ruot ken dutdot. Agtinnulongda a mangpakan kadagiti sibongda. Makita iti baba ti umok ti maysa a lalaki a masked weaver. Daytoy naanep a tumatayab idiay Africa agaramid iti umokna babaen ti panangusar kadagiti ruot wenno pirsay ti dadduma a mulmula. Makaaramid iti umokna iti uneg ti maysa nga aldaw ken makaaramid iti nasurok a 30 nga umok iti uneg ti maysa a tiempo!
Ti leksion? No ti Dios makaipaay kadagiti tumatayab kadagiti kasta a paglaingan ken nawadwad a materiales a pagaramid kadagiti umok, sigurado a matulonganna dagiti tattao nga adipenna a maaddaan iti kasapulanda a pagnaedan. Ngem impakita ni Jesus nga adda napateg a banag no kayattayo a tulongannatayo ni Jehova a Dios a manggun-od kadagiti material a kasapulantayo. “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo,” inkari ni Jesus. (Mateo 6:33) Nalabit iyimtuodyo, ‘Ania ti iramanna ti panangsapul nga umuna iti Pagarian ti Dios?’ Dagiti Saksi ni Jehova, a mangiwarwaras iti daytoy a magasin, maragsakanda a mangsungbat iti dayta a saludsod.