Ti Panangmatmat ti Dios Kadagiti Natay

TALAGA a nagsaem ti matayan iti patpatgen. Nagkaro ti pannakarikna iti kinakawaw, ladingit, ken pannakaulila. No matayan, mabalin a marikna ti maysa a tao ti kinaawan gaway, ta uray kasano kabaknang, kabileg, wenno kadakkel ti impluensiana, awan itan ditoy daga ti makaisubli iti biag ti natay a tao.

Ngem naiduma ti panangmatmat ti Namarsua kadatayo. Gapu ta isu ti nangbukel iti immuna a tao manipud iti tapok iti daga, kabaelanna met a parsuaen manen ti natay a tao. Gapu iti dayta, ti Dios mabalinna a matmatan dagiti natay a kasda la sibibiag. Maipapan kadagiti pimmusay a nagkauna a matalek nga adipen, kinuna ni Jesus: “Sibibiagda amin [iti panangmatmat ti Dios].”​—Lucas 20:38.

Idi adda ditoy daga, adda pannakabalin ni Jesus a mangpagungar. (Juan 5:21) Gapuna, minatmatanna dagiti natay a matalek a kas iti panangmatmat ni Amana. Kas pagarigan, idi pimmusay ti gayyemna a ni Lazaro, kinuna ni Jesus kadagiti adalanna: “Agbaniagaak . . . tapno riingek manipud pannaturogna.” (Juan 11:11) Natay ni Lazaro no iti panangmatmat ti tao, ngem matmaturog ni Lazaro no iti panangmatmat da Jehova ken Jesus.

Iti sidong ti Pagarian ni Jesus, addanto “panagungar agpadpada dagiti nalinteg ken dagiti nakillo.” (Aramid 24:15) Inton agangay, dagidiay mapagungar isuronto ida ti Dios ket maaddaanda iti namnama a biag nga agnanayon ditoy daga.​—Juan 5:28, 29.

Pudno, nagsaem ken makapaladingit unay ti matayan iti patpatgen, a nalabit agpaut iti adu a tawen. Nupay kasta, maliwliwatayo unay ken mapabileg ti namnamatayo no matmatantayo dagiti natay a kas iti panangmatmat ti Dios.​—2 Corinto 1:3, 4.