Salsaludsod Dagiti Agbasbasa

Ania ti rumbeng a panangmatmat dagiti Kristiano iti panagusar iti bato a mangisimbolo iti bulan a pannakayanak?

Iti dadduma a kultura, adda bato a manginaig iti bulan ti pannakayanak. Personal a desision ti maysa a Kristiano no ikeddengna ti agusar iti singsing nga addaan iti kasta a bato. (Galacia 6:5) Sakbay nga agdesision, adda dagiti napateg a banag nga ikabilangan.

Sigun iti Encyclopaedia Britannica, ti nadakamat a bato ket maysa a “saniata a nainaig iti petsa a nakayanakan ti maysa a tao, a ti panangisuot iti dayta ket gagangay a mamatmatan a mangyeg iti suerte wenno salun-at.” Innayon daytoy a reperensia: “Nabayagen a patien dagiti astrologo nga adda nakaskasdaaw a pannakabalin dagiti saniata.”

Nangnangruna idi nagkauna a tiempo, adu ti mamati a nagasat dagiti mangisuot iti kasta a bato. Patien kadi daytoy ti pudno a Kristiano? Saan, ngamin ammona a kinondenar ni Jehova dagidiay nangtallikud kenkuana ken nagtalek iti “dios ti Naimbag a Gasat.”​—Isaias 65:11.

Idi Edad Media, dagiti mammadles mangpilida iti saniata a mangisimbolo iti tunggal bulan ti tawen. Iparegtada kadagiti tattao nga isuotda ti saniata a mangisimbolo iti bulan a nakayanakanda tapno masalaknibanda iti pannakadangran. Ngem maikaniwas iti Kasuratan no suroten dagiti Kristiano ti ibagbaga dagiti mammadles yantangay ti Biblia kondenarenna dagiti mammadles.​—Deuteronomio 18:9-12.

Saan met a maiyanatup a dagiti Kristiano matmatanda a naisangsangayan ti pategna ti maysa a singsing nga addaan iti bato a mangisimbolo iti bulan a pannakayanak. Dagiti Saksi ni Jehova saanda a rambakan ti kasangay. Ngamin, dagiti kasta a rambak mangipaayda iti nalabes nga atension iti agkasangay. Maysa pay, dagiti laeng kasangay a nairekord iti Biblia isu dagiti kasangay dagiti agtuturay a saan nga adipen ti Dios.​—Genesis 40:20; Mateo 14:6-10.

Adda dagiti mangipapan a ti panangisuot iti singsing nga addaan iti bato a mangisimbolo iti bulan a pannakayanak ket addaan iti nasayaat nga impluensia iti personalidad ti agisusuot. Nupay kasta, dagiti pudno a Kristiano saanda a patien dayta, agsipud ta ammoda a ‘mapabaro ti personalidad’ babaen ti impluensia ti nasantuan nga espiritu ti Dios ken babaen ti panangyaplikar kadagiti Nainkasuratan a prinsipio.​—Efeso 4:22-24.

Napateg unay a sukimaten ti motibo. Iti panangikeddengna no isuotna ti maysa a singsing a mangisimbolo iti bulan a pannakayanak, ti maysa a Kristiano napateg nga iyimtuodna iti bagina, ‘Isuotko kadi dayta a singsing gapu laeng ta makaay-ayo kaniak ti saniatana, nupay naiparna a nainaig iti bulan a nakayanakak? Wenno naimpluensiaanak kadi kadagiti inaanito a kapanunotan nga innaig dagiti tattao kadagiti kasta a saniata?’

Ti maysa a Kristiano nasken a sukimatenna ti pusona tapno maammuanna ti motibona. “Ad-adda ngem iti isuamin a sabali pay a maaluadan, saluadam ta pusom,” kuna ti Kasuratan, “ta aggubuay iti dayta dagiti ubbog ti biag.” (Proverbio 4:23) Iti panangikeddeng no agusar iti bato a mangisimbolo iti bulan a pannakayanak, tunggal Kristiano nasken nga usigenna ti motibona ken dagiti posible nga epekto kenkuana ken kadagiti sabsabali ti pangngeddengna.​—Roma 14:13.