Dagiti Awan Linaonna a Pagurnongan ti Danum

IDI panawen ti Biblia, nagkali dagiti tattao kadagiti pagurnongan ti danum. Iti naunday a tiempo, idiay Naikari a Daga, dayta laeng ti pamuspusan tapno agtultuloy ti napateg a suplay ti danum.

Iti panangirekordna iti kinuna ti Dios, tinukoy ni propeta Jeremias dagiti pagurnongan ti danum iti piguratibo nga anag, a kunkunana: “Adda dua a dakes a banag nga inaramid ti ilik: Pinanawandak a mismo, ti ubbog ti sibibiag a danum, tapno agkutkotda maipaay iti bagbagida kadagiti pagurnongan ti danum, dagiti nagrengngat a pagurnongan ti danum, a saan a makalaon iti danum.”​—Jeremias 2:13.

Dagiti Israelita tinallikudanda ti Dios, ni Jehova​—“ti ubbog ti sibibiag a danum”​—ket nakialiansada kadagiti di mapagpannurayan a pagano a nasion ken nagdayawda kadagiti di makagaway, ulbod a didiosen. Sigun iti panangidilig ni Jeremias, dagita a nangnamnamaanda iti saranay ket mayasping kadagiti agubo a pagurnongan ti danum nga awanan iti bileg a mangsalaknib wenno mangispal.​—Deuteronomio 28:20.

Adda kadi masursurotayo iti dayta a pasamak? Kas idi kaaldawan ni Jeremias, ti agnanayon a Dios a ni Jehova isu ti agtultuloy a kakaisuna a Gubuayan ti mangted-biag a danum. (Salmo 36:9; Apocalipsis 4:11) Manipud kenkuana laeng, babaen ti Anakna, ni Jesu-Kristo, a makagun-od dagiti tattao iti biag nga agnanayon. (Juan 4:14; 17:3) Nupay kasta, kas kadagiti kasadaran ni Jeremias, adu a tattao ita ti nangilaksid ken nangibabain pay ketdi iti sao ti Dios kas nailanad iti Biblia. Imbes ketdi, nagtalekda kadagiti napolitikaan a solusion, ubbaw a natauan a panagrasrason, ken minamaag nga ideolohia ken pilosopia a mangibabain iti Dios. (1 Corinto 3:18-20; Colosas 2:8) Nalawag ti pagpilian. Pagtalkanyo? Agtalekkayo kadi iti “ubbog ti sibibiag a danum,” ni Jehova, wenno kadagiti “nagrengngat a pagurnongan ti danum, a saan a makalaon iti danum”?

[Ladawan iti panid 32]

Terra-cotta a pigurin ti ina a diosa a nasarakan iti maysa a tanem ti Israelita

[Credit Line]

Retrato nga ala ti British Museum