Mangpaimbag Kadi ti Pammati?

NO AGSAKITTAYO, kayattayo ti mabang-aran ken umimbag. Nalabit a naammuam iti Biblia a pinaimbag ni Jesu-Kristo ti adu a tattao a nagduduma ti sakitda, a nangyeg kadakuada iti bang-ar. Kasanona nga inaramid dayta? Babaen ti “pannakabalin ti Dios,” kuna ti Biblia. (Lucas 9:42, 43; Aramid 19:11, 12) Gapuna, ti nasantuan nga espiritu ti Dios ti nangpaimbag, saan a ti basta pammati ti maysa nga indibidual. (Aramid 28:7-9) Dayta ti makagapu a saan a kinalikaguman ni Jesus a mamati kenkuana dagiti masakit tapno umimbagda.

Nalabit a mayimtuodmo: ‘Nagpatingga kadin ti milagro a panangagas, wenno addanto ngata manen ti panangpaimbag a kas iti inaramid idi ni Jesus? Ania ti namnama dagidiay agsagsagaba iti naut-ot wenno di umimbag a sakit?’

Ilawlawag ti Biblia nga iti nalinteg a baro a lubong ti Dios, ti pannakabalin ti Dios pagbalinennanto manen a posible ti milagro a panangpaimbag kas inaramid ni Jesus idi adda ditoy daga. Dagiti Saksi ni Jehova iti lugaryo maragsakanda a mangipakita kadakayo no kasano ken kaano nga aramiden ti Dios ti banag a saan a maaramidan dagiti mangngagas babaen ti pammati​—ti panangikkat iti amin a sakit, agraman ti ipapatay. Kinapudnona, ti Dios “alimonennanto ni patay iti agnanayon.”​—Isaias 25:8.