Maar-aramid Kadi ti Pagayatan ti Dios?
“Maaramid koma ti pagayatam, kas sadi langit, kasta met iti daga.”—Mateo 6:10.
NAIMATANGAN da Julio ken Christina ti nakaal-alingget a pannakauram ti uppat kadagiti annakda. Bimtak ti nakaparada a luganda idi dinungpar ti sabali a lugan a manmanehuen ti nabartek. Ni Marcos, ti maikalima kadagiti annak, ket naispal manipud iti apuy, ngem nasiraman ti bagina, a permanente a nangbaliw iti langana. Ni Marcos ket agtawen iti siam. Nalapunos iti leddaang ti amana. Liniwliwana ti bagina ken ti pamiliana kadagitoy a sasao: “Pagayatan daytoy ti Dios, masapul nga awatentayo, naimbag, dakes, wenno aniaman dayta.”
Kasta ti reaksion ti adu no mapasamak ti umasping a didigra. ‘No ti Dios ket mannakabalin-amin ken maseknan kadatayo,’ ikalinteganda, ‘pagimbagantayo latta ti napasamak, nagrigat man a tarusan dayta.’ Umanamongkayo kadi?
Ti panangmatmat a pagayatan ti Dios ti aniaman a mapasamak, naimbag man wenno dakes, ket masansan a naibatay iti sasao ni Jesus iti maawagan a Kararag ti Apo, a naadaw iti ngato. Maar-aramid ti pagayatan ti Dios idiay langit, di ngamin? Iti panangikararag a ‘Maaramid koma ti pagayatam ditoy daga,’ saantayo kadi nga umanamong a pagayatan ti Dios ti mapaspasamak ditoy daga?
Adu dagiti agduadua iti daytoy a kapanunotan. Para kadakuada, ipamatmat dayta a ti Dios saanna nga ammo ti makipagrikna kadagiti pinarsuana a tattao. ‘Kasano a ti maysa a naayat a Dios pagayatanna ti banag a nakalkaldaang kadagiti inosente a tattao?’ iyimtuodda. ‘No kayat ti Dios a makasursuro dagiti tattao, ania koma ti masursuroda?’ Nalabit a kasta ti mariknayo.
Mainaig iti daytoy, ti kabsat ni Jesus iti ina, ni adalan a Santiago, insuratna: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta iti dakes a bambanag saan a mabalin a suoten ti Dios ket isu saanna met a suoten ti asinoman.” (Santiago 1:13) Saan a ti Dios ti gubuayan ti dakes. Nabatad ngarud a saan a pagayatan ti Dios ti amin a mapaspasamak ita ditoy daga. Ti Kasuratan dakamatenna met ti pagayatan ti tao, ti pagayatan dagiti nasion, ken uray ti pagayatan ti Diablo. (Juan 1:13; 2 Timoteo 2:26; 1 Pedro 4:3) Umanamongkayo kadi a ti napasamak iti pamilia da Julio ken Christina ket saan a mabalin a nagayatan ti maysa a naayat a nailangitan nga Ama?
No kasta, ania a talaga ti kayat a sawen ni Jesus idi insurona kadagiti adalanna nga ikararagda: “Maaramid koma ti pagayatam”? Dayta kadi ket maysa laeng a kiddaw tapno bumallaet ti Dios kadagiti partikular a kasasaad, wenno isursuronatayo kadi ni Jesus nga ikararagtayo a maaramid ti banag a napatpateg ken nasaysayaat, maysa a panagbalbaliw a mabalintayo amin a namnamaen? Usigentayo dagiti kanayonan nga ibaga ti Biblia.
[Picture Credit Lines iti panid 3]
Lugan: Dominique Faget-STF/AFP/Getty Images; ubing: FAO photo/B. Imevbore