Ti Panangikagumaan ti Sangatauan a Mangay-ayo iti Dios

“AWAN ti aniaman a kagimongan ti tao a saan a naimpluensiaan iti panamati iti Dios, kaaduanna kas soberano ken namarsua. Pudno dayta uray kadagiti sekular a kagimongan.” Dayta ti kuna ni John Bowker iti librona a God​—A Brief History. Iti nagduduma a pamay-an, naisinggalut iti kababalin ti tao ti panangsapul iti Dios ken pananggun-od iti anamongna. Iti sangalubongan, adu ti addaan iti napasnek a tarigagay a mangay-ayo iti Dios. Siempre, nagduduma ti panangaramidda iti dayta sigun kadagiti patpatienda.

Patien ti dadduma a ti laeng kasapulan tapno magun-od ti anamong ti Dios ket agbiag a nasingpet. Adda met dagiti mangibaga a magun-odda ti anamong ti Dios babaen ti panangtulong kadagiti napanglaw. Kanayonanna, napateg kadagiti minilion a tattao dagiti seremonia ken ritual.

Iti sabali a bangir, marikna ti dadduma a dida makaadani iti Dios​—nga adayo unay wenno okupado unay kadagiti dadduma a banag isu a saanna a maipaayan iti atension dagiti ordinario a tattao. Ti pilosopo a ni Epicurus iti nagkauna a Grecia ket naipadamag a mamati nga ‘adayo unay dagiti dios tapno maseknanda pay kadagiti aramid dagiti tattao.’ Kaskasdi, adu kadagiti agkunkuna iti kasta ket addaan relihion. Addada pay dagiti mangidatag iti daton ken mangaramid iti ritual tapno maay-ayoda dagiti natay nga inapoda.

Ania ti panagkunayo? Talaga kadi a makitkita ti Dios dagiti panagreggettayo a manggun-od iti anamongna? Posible kadi a matukaytayo ti puso ti Dios ket maay-ayotayo?

[Picture Credit Line iti panid 2]

AKKUB: Iti pammalubos iti ROE/Anglo-Australian Observatory, rinetrato ni David Malin