Ti Tulbek ti Napaut ken Naragsak a Biag
“TARIGAGAYANTAY amin ti agtultuloy nga agbiag; ngem awan ti mayat a lumakay.” Kasta ti kuna ti maysa a pagsasao. Adu a tattao nga asidegen nga agretiro ti agtarigagay a maaddaan iti ad-adu a tiempo para iti bagida ken basbassit nga annongen. Nupay kasta, maamakda a maawanan iti direksion ti biagda ken saan a nabunga. Kaamakda met ti maiputong, agliday, ken panagkapuy ti salun-at.
Ania ngarud ti sekreto ti naragsak a biag? Makatulong dagiti nasayaat a gagayyem ken naayat a pamilia a mangyeg iti kinaragsak agpadpada kadagiti agtutubo ken lallakay. Ngem ti napateg ket saan laeng a ti maitulong dagiti dadduma iti maysa a lakay. Ti napatpateg ket no ania ti maaramidna para kadagiti sabsabali.
Ipakita ti maysa a naunday a panangadal iti 423 nga agassawa a lallakay ken babbaket a ti “panangtulong iti biag dagiti dadduma a tattao mabalin a papautenna ti mismo a biagtayo.” Ni Stephanie Brown, a nangidaulo iti panagadal, inlawlawagna: “Ipakita dagitoy a panagadal nga ad-adda a makagunggona no ania ti maitedtayo iti maysa a relasion, saan a no ania ti maalatayo iti dayta.” Ti kasta a panangted mabalin nga iramanna ti panangtulong kadagiti sabsabali kadagiti obraen iti balay, panangaywan kadagiti ubbing, panagpaibaon, panangilugan, wenno panagimdeng iti napateg nga ibaga ti maysa.
Agarup 2,000 a tawenen ti napalabas, kinuna ni Jesu-Kristo: “Ad-adu ti kinaragsak iti panangted ngem iti panangawat.” (Aramid 20:35) Ti tulbek ti napaut ken naragsak a biag saan nga agpannuray iti dakkel nga urnong wenno iti agas ken taraon a pangkontra iti panaglakay. Imbes ketdi, agpannuray dayta iti panagtalinaed nga aktibo ken panangted iti tiempo, pigsa, ken bileg a mangpasayaat iti biag dagiti sabsabali.
Nupay kasta, ti panangted ket saan laeng nga isu ti kasapulan tapno maispaltayo iti panaglakay, sakit, ken ipapatay. Ti laeng Pagarian ti Dios ti mangikkat kadagita a parikut. Iti sidong ti panangiturayna, awanton ti panagsakit ken “awanton ni patay.” (Apocalipsis 21:3, 4; Isaias 33:24) Iti kinapudnona, dagiti natulnog a tattao naragsakdanto nga agbiag nga agnanayon iti paraiso a daga. (Lucas 23:43) Maragsakan dagiti Saksi ni Jehova a mangiranud iti tulbek ti napaut ken naragsak a biag.